بۇگىن ءبىز وتكەن اپتاداعى ەلوردانىڭ ەل نازارىن بۇرعان باستى جاڭالىقتارىنا شولۋ جاسايمىز.

استانادا كوپقاباتتى ۇيلەردىڭ ليفتەرىن اۋىستىرۋ جالعاسىپ جاتىر

قالادا كوپتەگەن ليفتىلەردى اۋىستىرۋ جۇمىسى جالعاسۋدا. ال بيىل استانالىق كوپقاباتتى ۇيلەردە 63 ءليفتىنى اۋىستىرۋ جۇمىستارى باستالدى.

جيرەنتاەۆ كوشەسىندەگى (14, 20/1, 22/2) مەن جۇماباەۆ 1, كۇمىسبەكوۆ 6, قاجىمۇقان 26, 28 ۇيلەردە ليفتىلەردى جوندەۋ جانە جاڭادان اۋىستىرۋ بويىنشا جۇمىستارى باستالدى. اتالعان ۇيلەردەگى ەسكى ليفتىلەر جىل سوڭىنا دەيىن وڭىرلەردى دامىتۋ باعدارلاماسى بويىنشا اۋىستىرىلماق. تۇرعىندار وعان قارجىنى مەملەكەتتىڭ ەسەبىنەن پايدالاندى. وسىنداي جولمەن ەسكى ليفتىلەرىن اۋىستىرعىسى كەلگەن تۇرعىندار «وركەن قالا» باعدارلاماسىنىڭ وپەراتورىنا قۇجات تاپسىرۋى كەرەك.

ارى قاراي كەلىسىمشارت بەكىتىلىپ، مەردىگەر تاڭدالادى. بارلىق جۇمىس تۇرعىنداردىڭ باقىلاۋىمەن وتكىزىلەدى. ەگەر مەملەكەتتەن قارجىنى 15 جىلعا السا، ورتا ەسەپپەن الاڭىنا بايلانىستى ءار پاتەرگە 2 مىڭ تەڭگەدەن شىعادى. جىل سوڭىنا دەيىن اتالمىش باعدارلاما بويىنشا 63 ليفت اۋىستىرىلادى.

ەستەرىڭىزگە سالا كەتەيىك، وسى جىلدىڭ كوكتەمىندە استانا اكىمى اسەت يسەكەشەۆ قالاداعى بارلىق ليفت شارۋاشىلىعىن تەكسەرۋدى جانە تارتىپكە كەلتىرۋدە كەشەندى شارا قولدانۋ كەرەكتىگىن تاپسىرعان بولاتىن. بۇگىندە استانادا 6 577 ليفت تىركەلگەن. ونىڭ 4 879 ءليفتىسى تۇرعىن ۇيلەردە، اكىمشىلىك عيماراتتاردا 1 728 تىركەلگەن.

«سەرگەك» كامەراسى ساۋدا ورتالىعىنداعى قاراقشىلىق شابۋىلدى انىقتادى

جامبىل وبلىسىنىڭ ءۇش تۇرعىنى ەلوردانىڭ ساۋدا ويىن-ساۋىق ورتالىعىنا قاراقشىلىق شابۋىل جاسادى.

ەلوردالىق پوليتسەيلەر «سەرگەك» بەينە كەشەنىنىڭ كومەگىمەن سوسو كۇزەتشىسىنە جاسالعان قاراقشىلىق شابۋىلىن انىقتادى.

«پوليتسياعا سوسو سىرتقى اۋماعىنىڭ قاۋىپسىزدىگىن قامتاماسىز ەتكەن جەكە كۇزەت فيرماسىنىڭ قىزمەتكەرىنەن ساعات تۇنگى 01.30 شاماسىندا بەلگىسىز ءۇش ازاماتتىڭ كۇش كورسەتىپ، سكوتچپەن قول-اياعىن بايلاپ، ورتالىققا كىرۋگە تالپىنعانى تۋرالى ارىز ءتۇستى. وعان قوسا قاسكويلەر ونىڭ راديوستانساسىن ۇرلاپ كەتكەن»، - دەلىنگەن ءىىد تاراتقان حابارلامادا.

ءىىد كريمينالدىق پوليتسيا قىزمەتكەرلەرى جەدەل-ىزدەستىرۋ شارالارى كەزىندە  «سەرگەك» بەينە كەشەنىنىڭ كومەگىمەن قاراقشىلىق شابۋىل جاساعان قىلمىستىق توپتى قولعا ءتۇسىردى.

بەلگىلى بولعانداي، قاراقشىلىقتى جامبىل وبلىسىنىڭ 21 جانە 23 جاستاعى ءۇش تۇرعىنى جاساعان.

«تەرگەۋ بارىسىندا ولار ساۋدا ورتالىعىنداعى بۋتيكتىڭ ءبىرىن توناماق بولعانىن مويىندادى. اتالعان قاراقشىلىق فاكتىسى بويىنشا سوتقا دەيىنگى تەرگەۋ امالدارى جۇرگىزىلۋدە»، - دەيدى ءىىد.

قۇتقارۋشىلار ەسىل وزەنىندە رەيد وتكىزدى

تج دەپارتامەنتى جەرگىلىكتى پوليتسيا  قىزمەتكەرلەرى جانە ووواجقج قۇتقارۋشىلارىمەن بىرلەسىپ، ەسىل وزەنىندە رەيدتەر وتكىزدى.

«قازىرگى تاڭدا قالالىق بالىقشىلار «Radisson» قوناق ءۇي ايماعىندا مۇز ۇستىنە شاتىرلاردى كوپتەپ تىگەدى. كەي ۋچاسكەلەردە بالىقشىلار سانى جيىرماعا دەيىن جەتەدى، ولارمەن ءار ۋچاسكەدە 7 بۇرعىلاۋ شۇڭقىرلارى جاسالعان. مۇز استىنا قۇلاپ كەتۋ قاۋپى بار بولعاندىقتان، اتالعان جاعداي قۇتقارۋشىلاردى الاڭداتپاي قويمايدى. مۇنىمەن قوسا، بالىقشىلاردا قۇتقارۋ كوكىرەكشەلەرى جوق.بۇل ءوز كزەگىندە قاۋىپتى جاعدايدى ورشىتە تۇسسە كەرەك»، - دەپ جازىلعان استانا قالاسى توتەنشە جاعدايلار دەپارتامەنتى ءباسپاسوز قىزمەتىنىڭ حابارلاماسىندا.

وسىنداي جاعدايلاردىڭ سانىن ازايتۋ، ولاردى بولدىرماۋ، ازاماتتاردىڭ ومىرلەرىنىڭ قاۋىپسىزدىگىن قامتاماسىز ەتۋ  ماقساتىندا تج دەپارتامەنتى جەرگىلىكتى پوليتسيا  قىزمەتكەرلەرى جانە ووواجقج قۇتقارۋشىلارىمەن بىرلەسىپ، ەسىل وزەنىندە رەيدتەر وتكىزگەن بولاتىن.

دەپارتامەنتتەن مالىمدەگەندە، الدىن الۋ شارالارىن جۇرگىزۋدىڭ بارىسىندا 12 رەيد ۇيىمداستىرىلعان. ەسىل وزەنىنىڭ بويىندا ۇيىمداستىرىلعان رەيدتىك شارا 26 بالىقشى مەن 12 ازاماتتى قامتىدى. وتكىزىلگەن جۇمىستاردىڭ ناتيجەسىندە قاۋىپتى ورىنداردان 5 شاتىر الىنىپ تاستالدى.

استانا قالاسى توتەنشە جاعدايلار دەپارتامەنتىنىڭ قىزمەتكەرلەرى مۇزداعى قاۋىپسىزدىكتى قامتاماسىز ەتۋ ءۇشىن ۇگىتتەۋ كىتاپشالارى مەن بۋكلەتتەرىن، سونىمەن قاتار ازاماتتارعا ۇزىلمەلى قاۋىپسىزدىك تالوندارىن  تاراتتى.

Abai.kz