Abai.kz اقپاراتتىق پورتالىنىڭ ەلەكتروندى پوچتاسىنا بەلگىلى اكتەر، قازاقستاننىڭ ەڭبەك سىڭىرگەن قايراتكەرى ومار قىيقىمنىڭ ماقالاسى كەلىپ ءتۇستى. اكتەر قر مادەنيەت جانە سپورت ءمينيسترى ارىستانبەك مۇحامەديۇلىنا قاتىستى سوڭعى كۇندەردە باق پەن الەۋمەتتىك جەلىلەردە ايتىلىپ جاتقان جەل سوزدەرگە بايىپپەن قاراۋ كەرەكتىگىن، وسى ۋاقىتقا دەيىن اتقارىلعان ۇشان-تەڭىز شارۋالاردى بولماشى مىسقىل سوزدەرمەن جويىپ جىبەرۋگە بولمايتىنىن ەسكەرتەدى. ءبىز اتالعان ماقالانى تولىعىمەن وقىرمان نازارىنا ۇسىنۋدى ءجون ساناپ وتىرمىز. 

Abai.kz اقپاراتتىق پورتالى

ەلباسىمىز ايتقان «رۋحاني جاڭعىرۋداعى» بارلىق باعدارلامالاردىڭ باسىم بولىگىنىڭ سالماعى مادەنيەت جانە سپورت مينيسترلىگىنە ءتۇسىپ تۇرعانىن ءبارىمىز دۇرىس سەزىنە ءبىلۋىمىز كەرەك. بۇل  سالانى باسقاراتىن ادام بىلىكتى، ءبىلىمدى، جان-جاقتى جانە رۋحاني باي، شىنايى ونەر جاناشىرى بولاتىنىنا ەشكىم شەك كەلتىرمەسە كەرەك. پرەزيدەنتىمىز  ەل تىزگىنىن ۇستايدى-اۋ دەگەن ازاماتتاردى وسىنداي قاسيەتتەرىنە، قارىم-قابىلەتىنە قاراي لاۋازىمدى قىزمەتكە تاعايىندايتىنى انىق. وسى تۇرعىدا  مادەنيەت جانە سپورت ءمينيسترى ا.مۇحامەديۇلىنىڭ  بىلىكتىلىگى، ءوز ءىسىنىڭ شەبەرى ەكەنى  اتقارعان قىزمەتتەرىنىڭ ناتيجەسىنەن كورىنىپ تۇر.

ءوزى جەتەكشىلىك ەتەتىن سالانىڭ جان-جاقتى دامۋىنا، ەلباسىنىڭ سىندارلى ساياساتىنىڭ جۇزەگە اسۋىنا، ۇلت كوشباسشىسى ايقىنداپ بەرگەن «رۋحاني جاڭعىرۋ» اياسىنداعى اۋقىمدى جۇمىستاردىڭ اتقارىلۋىنا تىكەلەي قولداۋ ءبىلدىرىپ، حالىقارالىق ءىس-شارالاردىڭ ۇيىمداستىرىلۋىن باستى نازاردا ۇستاپ وتىر.  ماسەلەن، ەل تاريحىندا قالعان اۋقىمدى جوبا «ەكسپو-2017» حالىقارالىق كورمەسىندەگى مادەني شارالار، «رۋحاني جاڭعىرۋ» اياسىندا اتقارىلىپ جاتقان جۇمىستار، قازاق ونەرىنىڭ الەم ساحنالارىنان كورىنۋى، وسى جىلدىڭ قازان ايىندا لوندوندا وتكەن قازاقستان ونەرىنىڭ فەستيۆالى، قاراشا ايىندا لوس-اندجەلەستە وتكەن كينو اپتالىق جانە ت.ب.

قازاق ونەرىنىڭ قاراشاڭىراعى –  اۋەزوۆ تەاترىنىڭ جاپونيادا وتەتىن گاسترولدىك  ساپارى دا قر مادەنيەت جانە سپورت ءمينيسترى ارىستانبەك مۇحامەديۇلىنىڭ تىكەلەي قولداۋىمەن ۇيىمداستىرىلىپ وتىر. تەك اۋەزوۆ تەاترى  عانا ەمەس، رەسپۋبليكامىزدىڭ ءار ايماعىنداعى وبلىستىق تەاترلار دا بۇل كۇندەرى الەمنىڭ الپاۋىت مەملەكەتتەرىندە وتەتىن فەستيۆالدەر مەن ءتۇرلى بايگەلەردە ونەر كورسەتىپ، جۇلدەگەر اتانىپ ءجۇر. بۇل دا بولسا «جاھانداعى زاماناۋي قازاقستاندىق مادەنيەت» جوباسى اياسىندا اتقارىلىپ جاتقان يگى شارالار. مۇنىڭ بارلىعى ەلباسىنىڭ قولداۋىمەن، مينيسترلىكتىڭ جۇمىلا جۇمىس ىستەۋىمەن جۇزەگە اساتىنى بارشامىزعا ءمالىم.

ونەر سالاسىنا قىزمەت ەتىپ جۇرگەن جانداردى شىنايى جاناشىرلىقپەن قولداپ، ولاردىڭ ودان ءارى تالماي تالپىنۋىنا مۇمكىندىك جاساپ جۇرگەن ا.مۇحامەديۇلىنىڭ پارلامەنتتە سويلەگەن ءسوزى – ونىڭ وسى سالانىڭ دامىپ، ءارى قاراي وركەندەۋىنە، قازاق ونەرىنىڭ الەم ساحنالارىندا سالتانات قۇرىپ، تالانتتارىمىزدىڭ قارىشتاپ سامعاۋىنا بارىنشا قامقور بولىپ جۇرگەنىن كورسەتتى.  ال، وسىنداي قىرۋار شارۋانى اتقارىپ، ەل قالاۋلىلارىنىڭ الدىندا ەسەپ بەرگەن ءمينيستردىڭ ءسوزىن  بۇرمالاماي، دۇرىس اقپاردى جەتكىزۋ باق وكىلدەرىنىڭ قولىندا تۇرعان دۇنيە. كوپكە توپىراق شاشپايمىن، بىراق كەيبىر جۋرناليستەردىڭ اقپاراتتى بۇرمالاپ جەتكىزۋى، ءسوز استارىن دۇرىس تۇسىنبەۋلەرىنەن بولدى ما ەكەن دەپ ويلايمىن. قازاق حالقى قاشان دا سوزگە توقتاعان. اتا-بابالارىمىز، جىراۋلار، بيلەر مەن شەشەندەر تاريحتا بولعان ءتۇرلى قاقتىعىستاردى، رۋارالىق تارتىستاردى ءبىر اۋىز سوزبەن شەشكەن. ماسەلەن، «مەن ءوزىمدى باي اكتەرمىن» دەپ سۇحبات بەرسەم، ماتەريالدىق جاعىنان باي ەمەس،ءوز رولدەرىممەن، ءوز شىعارماشىلىق ەڭبەگىممەن باي ەكەنىمدى ايتقانىم دەپ تۇسىنگەن دۇرىس شىعار.

وسى تۇرعىدا، جۋرناليستەر قاۋىمى ۇلتقا قىزمەت جاساپ جۇرگەن ازاماتتار مەن حالىق اراسىنداعى التىن كوپىر ەكەنىن ۇمىتپاسا ەكەن. ۇلت رۋحانياتىنا ەڭبەك ەتىپ جۇرگەن ازاماتتار مەن ازاماتشالاردىڭ ايتىلعان ءار ءسوزىن جان-جاققا الا قاشپاي،  ونىڭ استارىنا، مانىنە، تەرەڭىنە ءۇڭىلىپ، حالىققا دۇرىس جەتۋىن باستى نازاردا ۇستاسا...

«ونەر دەگەن – ادام بويىنداعى ىزگى قاسيەتتەردىڭ جيىنتىعى» دەسەك، بۇل قاسيەتتى ونەردىڭ كيەسى، قادىرى بولاتىنى تاعى بار. قاسيەتتى ونەرگە قىزمەت جاساپ جۇرگەن ءبىز، ءوز ەڭبەگىمىزدى كەلەكە-مازاق ەتۋگە جول بەرە المايمىز. سوندىقتان، ءمينيستردىڭ ايتقان ءسوزىن سان-ساققا جۇگىرتىپ،  «ەە، بۇلار اش بولعان سايىن كەرەمەت ونەر جاسايدى ەكەن...» دەگەن سياقتى مىسال ءسوزدى مىسقىل قىلماي، جانعان وتتان ۇشقىن قۋماي، ۋشىقتىرماي، كەلەڭسىز اڭگىمەگە تارتىپ، دابىرا قىلىپ، داۋرىقتىرىپ، وعان ماعىنا بەرىپ، رەڭ بەرۋدىڭ قاجەتى شامالى.

قازاق حالقى تالاي وقيعانى باستان كەشىردى. بىراق، ۇلت رەتىندە ءوزىن ساقتاپ قالدى. ونەر سالاسىندا دا ءتۇرلى ماتەريالدىق قيىندىقتار بولۋى مۇمكىن، بىراق، ءبىز، بۇل سالاعا ادال قىزمەت جاساۋدى ءارى قاراي جالعاستىرا بەرەمىز...

سوندىقتان، بايىبىنا بارماي، بايبالام سالماي، ءار نارسەنىڭ پارقىنا قاراپ، پاراساتپەن پايىمداعانىمىز ءجون-اۋ...

ومار قىيقىموۆ، قازاقستاننىڭ ەڭبەك سىڭىرگەن قايراتكەرى

Abai.kz