شىعىس قازاقستان وبلىسىندا "قازاقستاننىڭ بولاشاعى – قازاق تىلىندە" اتتى ءورىستىلدى ازاماتتارعا مەملەكەتتىك ءتىلدى ناسيحاتتاۋعا ارنالعان سەمينار وتەدى، - دەپ حابارلايدى Abai.kz اقپاراتتىق پورتالى. بۇل شارانى قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىناىڭ اياسىندا ۇيىمداستىرىپ وتىر.

شارانىڭ ماقساتى – ءورىستىلدى ازاماتتار اراسىندا قازاق ءتىلىنىڭ مەملەكەتتىك ءتىل رەتىندەگى مارتەبەسى، قازاقستانداعى ەتنوستاردىڭ بىرلىگى مەن ىنتىماعىنىڭ كەپىلى رەتىندەگى، قوعامدىق كوپشىلىك ورىندارداعى، جاس ۇرپاق تاربيەسىندەگى، پاتريوتتىق، عىلىم-ءبىلىم، جاڭا تەحنولوگيا سالاسىنداعى قىزمەتتەرى، قازاق ءتىلىن لاتىن قارپىنە كوشىرۋدىڭ ماڭىزدىلىعى، يدەولوگيالىق تۇرعىدان ەسكىرگەن ەلدى مەكەندەر مەن كوشەلەردىڭ اتاۋى، ولاردىڭ تاريحي اتاۋلارىن قايتارۋ، سونىمەن قاتار تاريحي جەر-سۋ اتاۋلارىن، ۇلتتىق تانىمعا جاقىن ءداستۇرلى اتاۋلاردى بەرۋ جانە ت.ب. تۋراسىندا ءسوز قوزعاۋ، پىكىر الماسۋ.

جۇمىس توبىنىڭ قۇرامىندا بەلگىلى ساياساتكەرلەر،  قوعام قايراتكەرلەرى، عالىمدار جانە جەرگىلىكتى اتقارۋشى ورگانداردىڭ وكىلدەرى بار. شاراعا قازاقستان حالقى اسسامبلەياسى عىلىمي-ساراپتاما كەڭەسىنىڭ مۇشەسى، ساياساتكەر، قازاقستانعا ەڭبەگى سىڭگەن قايراتكەر دوس كوشىم، ساياساتتانۋشى راسۋل جۇمالى، شىعىس قازاقستان وبلىسى تىلدەردى دامىتۋ باسقارماسىنىڭ باسشىسى ايدىن شايماردانوۆ، «اقجولتاي» گازەتىنىڭ قۇرىلتايشىسى، سەمەي ايماقتىق «اقجول» پارتياسىنىڭ توراعاسى راحات وماروۆ قاتىسادى.

شارا ۇستىمىزدەگى جىلدىڭ 16-20 قازان ارالىعىندا  وتەدى.

بارلىعى جوباعا 500-گە جۋىق ادام قامتىلادى، زيالى قاۋىم، ەتنومادەني بىرلەستىكتەر مۇشەلەرى، ءورىستىلدى ازاماتتار، جۇمىسشى جاستار، جوعارى وقۋ ورىندارىنىڭ، كوللەدجدەردىڭ ستۋدەنتتەرى جانە ت.ب.

Abai.kz