فرانتسيا سوتى باكۋدىڭ فرانتسۋز جۋرناليستەرىنە شاعىمىن كەرى قايتاردى
فرانتسيا سوتى ازەربايجان ۇكىمەتىنىڭ ەكى فرانتسۋز جۋرناليسىنە قارسى شاعىمىن قايتارىپ تاستادى. باكۋ جۋرناليستەردى "جالا جاپتى" دەپ ايىپتايدى. ايىپتالۋشىلار مەن ءسوز بوستاندىعىن قورعاۋشى بەلسەندىلەر شاعىمدى ازەربايجاننىڭ "تسەنزۋرانى شەتەلدەرگە تاڭۋ ارەكەتى" دەپ باعالايدى.
باكۋ حابار جۇرگىزۋشى جۋرناليستەر ەليز ليۋسە مەن لوران ريشاردى ەكى جىل بۇرىن شىققان ماتەريالدارىندا جالا جاباتىن اقپارات تاراتتى دەپ ايىپتايدى. ول ماتەريالداردا سول كەزدەگى فرانتسيا پرەزيدەنتى فرانسۋا وللاندتىڭ ازەربايجانعا ساپارىنان حابار تاراتقان جۋرناليستەر بۇل ەلدى "ديكتاتۋرا" دەپ اتاعان.
فرانتسۋز سوتى شەتەل ۇكىمەتىنىڭ جۋرناليستەرگە قارسى شاعىمىن ءبىرىنشى رەت قاراپ وتىر. ء"باسپاسوز تۋرالى زاڭ ساياسي تسەنزۋرانى بولدىرماۋ ءۇشىن قابىلدانعان" دەلىنگەن پاريج تۇبىندەگى نانتەر قالالىق سوتى سۋدياسىنىڭ قاۋلىسىندا.
وللاندتىڭ ازەربايجانعا ساپارى تۋرالى زەرتتەۋ باعدارلاماسىن تانىستىرعان ەليز ليۋسە 2015 جىلى قىركۇيەكتە France 2 تەلەارناسىنىڭ ەفيرىندە ازەربايجاندى "الەمدەگى ەڭ قاتال ديكتاتۋرانىڭ ءبىرى" دەپ سيپاتتاعان. ال لوران ريشار France Info راديوسىندا سۇحبات تۇرىندەگى حابارىندا ازەربايجاندى "ديكتاتۋرا" دەپ اتاعان. ريشار مەن ونىڭ وپەراتورى 2014 جىلى مامىردا باكۋدە ءىسساپاردا جۇرگەنىندە ۇستالىپ، از ۋاقىتتان سوڭ بوساتىلعان. ول كەزدە تەحنيكالىق قۇرالدارىن تارتىپ العان.
Abai.kz
