2017 جىلعى 7 قىركۇيەكتە وسكەمەن قالاسىندا ەۋرازيالىق ينتەگراتسيا ينستيتۋتى «جاڭعىرۋ 3.0: رۋحاني جاڭعىرۋ» دەگەن تاقىرىپتا ۇيىمداستىرىپ جۇرگەن ساراپشىلىق كەزدەسۋلەر سەرياسىنىڭ ءىى-ءشى وڭىرلىك دوڭگەلەك ۇستەلىن وتكىزدى، - دەپ حابارلايدى اباي-اقپارات.

وسى ساراپشىلىق تالقىلاۋدا رۋحاني جاڭعىرۋ باعدارلاماسىنداعى 6 شەشۋشى جوبانىڭ ءبىرى بولىپ تابىلاتىن «قازاقستانداعى 100 جاڭا ەسىم» جوباسىنىڭ شىعىس قازاقستان وبلىسىندا ىسكە اسىرىلۋ ماسەلەسىنە باسا ءمان بەرىلدى.

دوڭگەلەك ۇستەلدىڭ جۇمىسىنا وبلىستىڭ عىلىمي-ساراپشىلىق قوعامداستىعىنىڭ، ازاماتتىق سەكتورى مەن جەرگىلىكتى اتقارۋشى ورگاندارىنىڭ 40-تان استام وكىلى قاتىستى.

شىعىس قازاقستان وبلىسى اكىمدىگى ىشكى ساياسات باسقارماسىنىڭ باسشىسى نەللي كراسنوباەۆا ءوزىنىڭ العىسوزىندە باعدارلامانىڭ وبلىستا ىسكە اسىرىلۋ بارىسى تۋرالى ايتىپ بەردى.

ەۋرازيالىق ينتەگراتسيا ينستيتۋتىنىڭ ديرەكتورى عاني نىعىمەتوۆ ءوز سوزىندە شىعىس قازاقستان وبلىسىنىڭ عىلىمي-ساراپشىلىق قوعامداستىعىن رۋحاني جاڭعىرۋ جوبالارىن تالداۋ مەن تالقىلاۋعا بەلسەنە قاتىسۋعا، سونداي-اق ولاردى ىسكە اسىرۋ تەتىكتەرىن جەتىلدىرۋ جونىندە سىندارلى ۇسىنىستار بەرۋگە شاقىردى.

– «مۇنداي كەزدەسۋلەر ساراپشىلىق قوعامداستىق پەن مەملەكەتتىك بيلىك وكىلدەرى اراسىندا وزىنشە ءبىر «ساعات ءتىلىن تەڭەستىرۋ» ءرولىن اتقارادى. بۇل شارالار ورتالىق پەن وڭىرلەردە جاڭعىرۋ پروتسەسىنىڭ قانشالىقتى قاتار ءجۇرىپ جاتقانىن، ولاردىڭ قوعامدا ءتۇسىندىرۋ دەڭگەيىن جانە جەرگىلىكتى جەرلەردە ىسكە اسىرىلۋ ساپاسىن انىقتاۋعا كومەكتەسەدى»، – دەپ اتاپ ءوتتى ع. نىعىمەتوۆ.

وسى شارا بارىسىندا س. امانجولوۆ اتىنداعى شقمۋ پرورەكتورى انار مىرزاعاليەۆا ىسكە اسىرىلىپ جاتقان جوبالاردىڭ عىلىمي نەگىزدىلىگى تۋرالى بايانداما جاسادى. كەزدەسۋ بارىسىندا سونداي-اق: ا.س. پۋشكين اتىنداعى وبلىستىق كىتاپحانا ديرەكتورىنىڭ ورىنباسارى بيبىگۇل شاعيەۆا، شىعىس قازاقستان ونەر مۋزەيىنىڭ ديرەكتورى تاتيانا شاربارينا، شقو ءبىلىم بەرۋ باسقارماسى «شىعىس» وڭىرلىك ورتالىعى ديرەكتورىنىڭ ورىنباسارى اركادي يساەۆ، شقو ءبىلىم بەرۋ باسقارماسى «ءبىلىم بەرۋدەگى جاڭا تەحنولوگيالاردىڭ شىعىس قازاقستاندىق رەسۋرستىق ورتالىعى» كمم ديرەكتورىنىڭ ورىنباسارى اسەل وسپانوۆا، سونداي-اق شقو قازاقستان حالقى اسسامبلەياسى حاتشىلىعىنىڭ مەڭگەرۋشىسى اسقار نۇرعازيەۆ سپيكەرلەر مىندەتىن اتقاردى.

دوڭگەلەك ۇستەل قورىتىندىسىندا وعان قاتىسۋشىلار رۋحاني جاڭعىرۋ باعدارلاماسىن ىسكە اسىرۋ پروتسەسىن جەتىلدىرۋ جونىندەگى بىرلەسكەن ۇسىنىمداردى ازىرلەۋ ءۇشىن وسىنداي فورماتتاعى كەزدەسۋلەردىڭ قۇندى ەكەنىن تىلگە تيەك ەتە وتىرىپ، وسى سۇحبات الاڭىن ۇيىمداستىرۋشىلارعا ءوز ريزاشىلىعىن ءبىلدىردى.

Abai.kz