1990 جىلدارى كاتالونيالىق «بارسەلونا» مەن بولگاريا ۇلتتىق قۇراماسىندا جاسىنداي جارقىلداعان ايگىلى فۋتبولشى حريستو ستويچكوۆ EXPO 2017 Football Cup تۋرنيرىنە كەلەدى.

51 جاستاعى بولگار مامانى جۇلدىزدار كومانداسىن جاتتىقتىراتىن بولدى. بۇل قۇراما ساپىندا ەرنان كرەسپو، گايسكا مەندەتا، جەرەمي نجيتاپ، الەكساندر شوۆكوۆسكي، ياري ليتمانەن جانە تاعى باسقا ويىنشىلار ونەر كورسەتەدى. سونىمەن قاتار ستويچكوۆ ەكسپو نىساندارىن ارالاپ كورمەك. بۇل تۋرالى EXPO 2017 Football Cup ءتۋرنيرىنىڭ Facebook-تەگى رەسمي پاراقشاسىندا جازىلعان. حريستو ستويچكوۆ «بارسەلونا» ساپىندا 1990-1997 جىلدار ارالىعىندا ء(بىر جىل ۇزىلىسپەن) ويناپ، 175 ماتچتا 83 گول سوقتى. بۇدان بولەك ول تسسكا (بولگاريا), «پارما» (يتاليا), «ال-ناسر» (ساۋد ارابياسى), «كاسيۆا رەيسول» (جاپونيا), «چيكاگو فاير» جانە «دي سي يۋنايتەد» (اقش) كوماندالارىنىڭ نامىسىن قورعادى. بولگاريا قۇراماسى ساپىندا 83 ويىن وتكىزىپ، 37 دوپ سالدى. ول يسپانيانىڭ ءتورت دۇركىن چەمپيونى، 1991/1992 جىلعى ەۋروپا چەمپيوندارى كۋبوگىنىڭ (چەمپيوندار ليگاسىنىڭ بۇرىنعى اتاۋى), 1996/1997 جىلعى ۋەفا كۋبوكتارى كۋبوگىنىڭ، ۋەفا-نىڭ ەكى سۋپەركۋبوگىنىڭ (1992, 1997) يەگەرى. ستويچكوۆ بەس مارتە بولگاريانىڭ ۇزدىك فۋتبولشىسى بولىپ تانىلدى. 1990 جىلى ەۋروپانىڭ ۇزدىك سۇرمەرگەنىنە بەرىلەتىن «التىن بۋتساعا» يە بولدى، 1994 جىلعى الەم چەمپيوناتىنىڭ ۇزدىك مەرگەنى اتاندى.   الايدا ونىڭ باستى جەتىستىگى — «التىن دوپ». 1994 جىلى ستويچكوۆ ەۋروپانىڭ ۇزدىك ويىنشىسى اتاعىنا يە بولىپ، وسى ماراپاتتى قانجىعاسىنا بايلادى. World Soccer مەن FIFA نۇسقالارى بويىنشا حح عاسىرداعى ەڭ ۇزدىك 100 فۋتبولشىنىڭ قاتارىنا كىردى. ويىنشى رەتىندەگى مانسابىن اياقتاعان سوڭ حريستو ستويچكوۆ بولگاريا قۇراماسىنىڭ باس باپكەرى بولدى. ءۇش جىلدان كەيىن قۇراما تىزگىنىن تاستاپ، يسپانيانىڭ «سەلتا» كلۋبىن جاتتىقتىردى. ودان كەيىن وڭتۇستىك افريكا رەسپۋبليكاسىنىڭ «مامەلودي ساۋنداۋنز»، بولگاريانىڭ «ليتەكس» جانە تسسكا كلۋبتارىنىڭ باس باپكەرى قىزمەتىن اتقاردى.

اباي-اقپارات