الماتى وبلىسىنىڭ كاسىپكەرلەر پالاتاسى التى اي ىشىندە كاسىپكەرلەردىڭ 125 ميلليون تەڭگەسىن ۇنەمدەۋگە كومەكتەستى. بۇل تۋرالى وڭىرلىك كوممۋنيكاتسيالار قىزمەتى الاڭىندا بەلگىلى بولدى.

كاسىپكەرلەر پالاتاسىنىڭ ءبىرىنشى جارتىجىلدىق قورىتىندىسى بويىنشا، پالاتاعا كاسىپكەرلەردىڭ قۇقىعىن قورعاۋ باعىتىندا 114 ءوتىنىش كەلىپ تۇسكەن. ونىڭ 59-ى وڭ ناتيجەسىن تاپتى.

جىل باسىنان بەرى 3,6 مىڭنان استام كاسىپكەرلەر مەن جەكە تۇلعالارعا تەگىن سەرۆيستىك قىزمەت كورسەتىلىپ، 9 مىڭنان استام ازاماتقا مەملەكەتتىك باعدارلاما بويىنشا اقپارات بەرىلدى. كاسىپكەرلەرگە 218 بيزنەس-جوسپار ازىرلەندى. قازىرگى تاڭدا جالپى جوبالار 122,8 ميلليون تەڭگەگە قارجىلاندىرىلىپ جاتىر.

«وزدەرىڭىز بىلەتىندەي، بيىل ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا ءبىز «باستاۋ بيزنەس» جوباسىن ىسكە قوستىق. باعدارلاما ءبىر اي كولەمىندە بيزنەس نەگىزدەرىن ۇيرەتۋدى كوزدەيدى. بۇگىن جەتى اۋداندا 611 قاتىسۋشى وقىتىلدى. سونىڭ ىشىندە 53 تىڭداۋشى جالپى سوماسى 300 ملن تەڭگەگە تەڭ نەسيەگە قول جەتكىزدى»، - دەپ اتاپ ءوتتى كاسىپكەرلەر پالاتاسى ديرەكتورىنىڭ ەكونوميكالىق ماسەلەلەر بويىنشا ورىنباسارى اسەت شاياحمەتوۆ.

تاعى ءبىر ماڭىزدى باعىتتاردىڭ ءبىرى – اگروونەركاسىپتىك كەشەندى قولداۋ. جارتى جىل ىشىندە پالاتانىڭ سۇيەمەلدەۋىمەن 12 اۋىل شارۋاشىلىعى كووپەراتيۆى قۇرىلدى. «اۋىل شارۋاشىلىعىنا قارجىلىق قولداۋ قورى» ارقىلى 9 كووپەراتيۆكە قارجىلاندىرۋعا كومەك بەرىلدى. اۋىل كاسىپكەرلەرىنىڭ بىلىكتىلىگىن ارتتىرۋ مەن جاڭا تەحنولوگيالاردى ەنگىزۋگە قولداۋ ءبىلدىرۋ ماقساتىندا وبلىس بويىنشا مال جانە ەگىن شارۋاشىلىقتارى بويىنشا ءتۇرلى سەمينار-ترەنينگتار وتكىزىلىپ جاتىر.

Abai.kz