مولالارعا ءتىل بىتسە نە دەر ەدى؟ قىتاي بالقاشقا دەيىنگى جەر بىزدىكى دەيدى، رەسەي ءتىپتى كۇللى قازاقستاندى ءوز جەرى سانايدى، وزبەكتىڭ كەي تاريحشىسى شىمكەنتكە دەيىن ءبىزدىڭ ولكە دەپ كوكىپ ءجۇر. سونداي ساتتە وبالارعا ءتىل بىتسە اقيقاتتىڭ بەتى اشىلار ەدى. كىمنىڭ جەرى ەكەنىن قورىمدا جاتقان مۇردە بىلمەسە، مىڭگىرلەگەن ساياساتكەردىڭ بىلمەسى انىق.

بالقاشقا دەيىن قىتايدىڭ جەرى بولسا، ءشۇرشىتتىڭ مولاسى نەگە جوق؟ كوپ ايماق رەسەيدىڭ جەرى بولسا، ورىستىڭ مولالارى نەگە ءحىح عاسىردان، ياعني وتارلاۋ كەزەڭىنەن عانا باستاۋ الادى؟ وزبەكتىڭ قورىمى دا ءدال سولاي. ويتكەنى بۇل جەر تەك قازاقتىكى بولعان. مىڭداعان جىلدار بويى تۇرعان قورىمدار سونىڭ كۋاسى. قازاقتىڭ قورىمدارى قىتايداعى التاي ولكەسىندە، رەسەيدەگى ورىنبور، ومبى مەن تومبىسىندا، وزبەكتىڭ تاشكەنتىندە جەتەرلىك. بۇل اتالمىش ايماقتىڭ قازاققا تيەسىلى بولعاندىعىنىڭ بۇلتارتپاس ايعاعى. بىراق وزگەدە كەتكەن جەردى داۋلاپ جاتقان ءبىز جوق. "ونبەيتىن داۋدى وسپەيتىن ەل (ەر) قۋالايدى" دەدىك تە قويدىق. بىراق باسقالار جالعاننىڭ شوعىن ۇرلەپ، وتىن جاعۋدا.سوندىقتان وزگەدە كەتكەن مەكەندى قايتارماساق تا، مەسەلىمىزدى تۇسىرمەۋ ءۇشىن شىندىقتى جاس ۇرپاققا ايتقان دۇرىس.

التاي دا - الاشتىڭ جەرى، تاشكەنت - تولە بي جاتقان قازاقتىڭ ەلى، ورىنبور ءوز ورنىمىز دەپ ۇيرەتسەك، جاس ۇرپاق بوگدەنىڭ بىقسىتاتىن وتىرىك وسەگىنە، ساياسي قاقپانىنا تۇسە قويماس. ايتپەسە قازاقتىڭ جەرىنە كوز تاستايتىن شيبورىلەر كوبەيۋدە.

اسحات حاسەنعالي

Facebook-تەگى پاراقشاسىنان