تالعار اۋدانى «لەسنايا سكازكا» تۋريستىك كەشەنى اۋماعىندا الماتى وبلىسىنىڭ اكىمى اماندىق باتالوۆ قوعامدىق ومىرگە ەتەنە ارالاسىپ جۇرگەن جاستارمەن بەيرەسمي تۇردە كەزدەستى.

كەزدەسۋگە وبلىس اكىمىنىڭ ورىنباسارى جاقسىلىق ومار، اۋدان، قالالىق جاستار رەسۋرستىق ورتالىقتارىنىڭ جەتەكشىلەرى، «كوشباسشى» جاستار سىيلىعىنىڭ يەگەرلەرى، «VIP» عىلىمي جوبالار بايقاۋىنىڭ جەڭىمپازدارى، جاس عالىمدار، جاس دەپۋتاتتار، «جاس وتاۋ» بايقاۋىنىڭ جەڭىمپازدارى، جاس كاسىپكەرلەر جانە  باق وكىلدەرى قاتىستى. وبلىس اكىمى بەلسەندى جاستار اراسىندا تىعىز بايلانىس ورناتا وتىرىپ، جەر ءجانناتى جەتىسۋ ءوڭىرىنىڭ ونەرلى دە ورەلى جاستارىمەن ەمىن-ەركىن پىكىر الماسىپ، جاستار قاۋىمى وزدەرىن بارىنشا ەركىن ۇستاپ، وبلىس اكىمىنە ۇسىنىس-تىلەكتەرىن جەتكىزدى.

«اسقارالى الاتاۋدىڭ باۋرايىندا ءوڭىرىمىزدىڭ وزدەرىڭىزدەي جالىنداعان جاستارىمەن كەزدەسىپ وتىرعانىما زور قۋانىشتىمىن. وسىنداي سۇلۋ تابيعاتتىڭ تورىندە وتىرىپ، وي-پىكىر بولىسۋگە كەلگەن ءاربىرىڭىز باقىتتىسىزدار. سەبەبى، ءبىز تابيعاتى كوركەم، توپىراعى باي، جاسىل جەلەكتى وڭىردە دۇنيەگە كەلىپ، ەڭبەك ەتىپ جاتىرمىز. بۇل – بىزگە بۇيىرعان باقىت»، - دەدى اماندىق عابباسۇلى.

باسقوسۋدا «VIP» عىلىمي جوبالار بايقاۋىنىڭ جەڭىمپازدارى ماراپاتتالدى. عىلىمنىڭ وركەندەۋىنە وزىندىك قولتاڭباسىن ارناعان جاس عالىمدار ماعجان ىسقاقوۆ، كسەنيا مەرەشكوۆا، شىڭعىس نۇرعوجاەۆ، گۇلىم اسحاتقىزى، جىگەر بەرلىقوجانىڭ عىلىمي ەڭبەكتەرى وبلىس اكىمىنىڭ قارجىلاي قولداۋىنا يە بولدى.

كوزدەرىنەن وت لاپىلداپ تۇرعان جاستاردىڭ وبلىس اكىمى اماندىق عابباسۇلىمەن كەزدەسكەن قۋانىشتارىندا شەك بولمادى. سوندىقتان دا ولار ەش توسىلماستان سان الۋان سۇراقتار قويدى. بويىنان قاراپايىمدىلىقتىڭ جىلى لەبى ەسكەن پاراساتتى باسشى جاستاردىڭ ءار ساۋالىنا اسا بايىپپەن جاۋاپ قايىردى.شارا سوڭىندا وبلىس اكىمى اماندىق عابباسۇلى جاستاردىڭ سۇراۋى بويىنشا بىرگە ءان شىرقاپ، ەستەلىك سۋرەتكە ءتۇستى.

Abai.kz