قر اۋىلشارۋاشىلىق مينيسترلىگىنىڭ جەر رەسۋرستارىن باسقارۋ كوميتەتى ارنايى تەكسەرۋ جۇرگىزىپ، كوميتەتتىڭ تەكسەرۋ قورىتىندىسى تۋرالى 2016 جىلدىڭ 22 شىلدەسىندەگى № 42-16-29-1/1 اكتىسىنە سايكەس شىعىس قازاقستان وبلىسى ءۇرجار اۋدانىنىڭ اكىمشىلىگى تاراپىنان «ءباتۋا» «ىرعىن»، «مانفاعات» جشس 91432,5 گەكتار جەردى زاڭسىز جالعا بەرگەنىن انىقتاعان.

سونىڭ ناتيجەسىندە اشم جەر رەسۋرستارىن باسقارۋ كوميتەتى اتالعان سەرىكتەستىكتەرگە جەر بەرۋ تۋرالى شقو ءۇرجار اۋدانىنىڭ جەر بەرۋ جونىندەگى قاۋلىلارىنىڭ كۇشىن جويۋ تۋرالى سوتقا ارىز بەرىپ، ناتيجەسىندە، 23 قاراشا 2016 جىلى شقو ارنايى مامانداندىرىلعان ەكونوميكالىق سوتىنىڭ شەشىمىمەن «ءباتۋا» جشس جەر پايدالانۋ قۇقىعىنداعى 84 182 گەكتار اۋىلشارۋاشىلىق جەرى مەملەكەتكە قايتارىلعان بولاتىن.

ودان كەيىن ءبىز، قر اۋىلشارۋاشىلىق مينيسترلىگىنە قالعان 7 250 گەكتار جەردىڭ نە ءۇشىن قايتارىلماي قالعانى تۋرالى تاعى حاتتار جازىپ، اشم جەر رەسۋرستارىن باسقارۋ كوميتەتىمەن بىرلەسە جۇمىس جاساعان ەدىك.

اشم جەر رەسۋرستارىن باسقارۋ كوميتەتىنىڭ تالاپ ارىزىنىڭ ناتيجەسىندە شقو ارنايى مامانداندىرىلعان ەكونوميكالىق سوتىنىڭ 03 شىلدە 2017 جىلعى №2-2143-17 شەشىمىمەن قىتاي كومپانياسىنىڭ ۇلەسى بار «ءباتۋا» جشس جەر پايدالانۋ قۇقىعىنا بەرىلگەن 7 244,7 گەكتار جانە جەكە مەنشىككە ساتىلىپ كەتكەن 5,3 گەكتار جەر مەملەكەتكە قايتارىلدى.

وسى ءىستىڭ باسى قاسىندا بولىپ، بىرگە ات سالىسقان «الاش جولى» قوزعالىسىنىڭ مۇشەلەرىنە، قر باس پروكۋراتۋراسىنا، شقو پروكۋراتۋراسىنا، اۋىل شارۋاشىلىق مينيسترلىگىنە جانە مينيسترلىكتىڭ جەر رەسۋرستارىن باسقارۋ كوميتەتىنە ريزاشىلىعىمىزدى بىلدىرەمىز.

جۇمىس ودان ءارى جالعاسۋدا.

قۇرمەتپەن، ماقسات ءىلياسۇلى جانە ايدىن ەگەۋباەۆ

Abai.kz