وڭتۇستىك قازاقستان وبلىسى رەسپۋبليكاداعى حالقى تىعىز ورنالاسقان ايماقتارىنىڭ ءبىرى سانالادى. وسىعان وراي وڭىردەگى جۇمىسسىزدىق دەڭگەيى تومەندەتۋ ماقساتىندا  حالىقتى  جۇمىس كۇشى جەتىسپەيتىن سولتۇستىك وڭىرلەرگە كوشىرۋ  جۇمىستارى جالعاسىپ كەلەدى. دەسەك تە، ىشكى كوشى-قون ساياساتىنىڭ ەل اراسىندا ناسيحاتتالۋى ءتيىستى دەڭگەيدە ەمەس. بۇگىن بۇل تۋرالى  وڭتۇستىك قازاقستان وبلىسى اكىمى جانسەيىت تۇيمەباەۆ اۋدان، قالا اكىمدەرىمەن جانە وبلىستىق باسقارمالار باسشىلارىنىڭ قاتىسۋىمەن  وتكەن سەلەكتورلىق ماجىلىستە ءمالىم ەتتى.

«ەلباسى قويعان مىندەتتەردىڭ ءبىرى ىشكى كوشى-قون پروتسەسستەرىن رەتتەۋ جانە ەڭبەك رەسۋرستارىنىڭ تەڭگەرىمدىلىگىن ارتتىرۋ، حالىقتى بىركەلكى جايعاستىرۋ ماقساتىندا ەڭبەك كۇشى مول ايماقتان، ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە ءوز ەركىمەن حالىقتى قونىستاندىرۋ وتە ماڭىزدى قادام. جۇمىسسىزدىق، حالىققا الەۋمەتتىك قولداۋ كورسەتۋ ماسەلەلەرى بويىنشا قيىندىقتار بولۋى مۇمكىن، سوندىقتان قونىس اۋدارام دەۋشىلەرگە كومەك كورسەتۋىمىز كەرەك»-دەدى جانسەيىت قانسەيىتۇلى.

جيىندا حالىقتى وڭتۇستىكتەن سولتۇستىككە كوشىرۋ جۇمىستارى جونىندە بايانداعان  وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسى مۇحيت وتارشيەۆ 2014-2016 جىلدارى «جۇمىسپەن قامتۋ 2020 جول كارتاسى» باعدارلاماسى شەڭبەرىندە وبلىستان بارلىعى 154 وتباسى قونىس اۋدارىپ، كوشۋ شىعىندارى وتەلگەندىگىن جەتكىزدى.

ونىڭ ايتۋىنشا، باسقارما تاراپىنان قونىس اۋدارعان ازاماتتارعا سول وڭىردەگى ۋاكىلەتتى ورگاندار ارقىلى مونيتورينگ جۇمىستارى جۇرگىزىلگەن. قازىرگى تاڭدا كوشىپ بارعانداردىڭ  48-ءى اۋىل شارۋاشىلىعىمەن اينالىسسا، 42 ازامات ءبىلىم سالاسىندا، 11 ادام جەرگىلىكتى اتقارۋ ورگاندارىندا، 12 ادام قىزمەت كورسەتۋ، 7 ادام  دەنساۋلىق ساقتاۋ سالاسىندا ەڭبەكپەن قامتىلعان.

ال، وڭىرارالىق ەڭبەك نارىعىن دامىتۋدىڭ شارالارىنا  5780 ازامات قاتىسىپ، ولاردىڭ 2019-ى سولتۇستىككە قونىس اۋدارۋعا نيەتتى ەكەندىكتەرىن جەتكىزگەن.  وسى ازاماتتاردىڭ 1008 ەڭبەككە قابىلەتتى بولسا، ولاردىڭ 116 ادامى اۋىل شارۋاشىلىعىمەن، 98 ادام كاسىپكەرلىكتى دامىتۋمەن، 794 ادام مەملەكەتتىك كاسىپورىنداردا جۇمىس ىستەۋگە نيەتتى.

سونداي-اق ماجىلىستە ءسوز العان وبلىستىق ءماسليحات دەپۋتاتى جاڭاباي اعابەكوۆ وڭتۇستىك حالقىن سولتۇستىككە كوشىرۋ ەرىكتى تۇردە ءجۇرىپ جاتقاندىعىن العا تارتتى. ولارعا ۇكىمەت تاراپىنان دا ايتارلىقتاي كومەك كورسەتىلەدى. ناقتى ايتقاندا، قونىس شىعىندارى ەسەبىندە وتباسى مۇشەلەرىنىڭ ارقايسسىنا 35 اەك كولەمىندە  ياعني 79 مىڭ تەڭگە وتەماقى تولەنەدى. بۇدان بولەك ءبىر جىلعا دەيىن پاتەر جالداۋعا جۇمسالاتىن شىعىن دا مەملەكەت ەسەبىنەن. الەۋمەتتىك قامسىزداندىرۋ، كوشى-قون كۆوتاسىنا دا قارجى قاراستىرىلعان.

«كوشۋ ءار ادامنىڭ جەكە ءىسى. ەشكىمدى كۇشتەمەيمىز. دەگەنمەن نيەت بىلدىرگەندەرگە جول شىعىنى، باسپانا جالداۋدى ايتپاعاندا، سول بارعان جەرىنە ۇيرەنىسىپ كەتكەنشە، قارجىلاي كومەك بەرەمىز. جۇمىسقا تۇرۋىن دا قاداعالاپ وتىرامىز»،-دەدى جاڭاباي مولدابايۇلى.

ماسەلەنى قورىتىندىلاي كەلە ءوڭىر باسشىسى  حالقى تىعىز ورنالاسقان ماقتاارال اۋدانىندا بۇل جۇمىستاردىڭ سىلبىر جۇرگىزىلىپ جاتقاندىعىن سىنعا الدى.

ايتا كەتەيىك، ماقتارال اۋدانى حالقى وتە تىعىز اۋدانداردىڭ بىرىنە جاتادى. بۇگىنگى تاڭدا  اۋداندا اتالعان  ماسەلە بويىنشا اتقارىلىپ جاتقان جۇمىستار جەتكىلىكسىز. سوڭعى ەكى جىلدا بار-جوعى اۋداننان 12 وتباسى عانا ەلىمىزدىڭ سولتۇستىك وڭىرلەرىنە قونىس اۋدارعان.

سولتۇستىك وڭىرلەرگە قونىس اۋدارۋعا نيەتى بار وبلىس تۇرعىندارىنىڭ ەرىكتى قونىس اۋدارۋىنا ىقپال جاساۋ ءۇشىن وبلىس كاسىپكەرلەرىن قاتىستىرا وتىرىپ سول وڭىرلەرگە ءىس-ساپار ۇيىمداستىرۋدى جۇكتەگەن وبلىس باسشىسى اۋدان، قالا اكىمدەرىنە، سالالىق باسقارمالارعا بىرقاتار تاپسىرمالار بەردى.

ءشارىپحان قايسار

 Abai.kz