2017 جىلعى 22-25 ماۋسىمدا استانادا دۇنيەجۇزى قازاقتارىنىڭ V قۇرىلتايى وتكىزىلەدى، ونىڭ جۇمىسىنا 800-دەن استام دەلەگاتتار مەن مەيماندار، ونىڭ ىشىندە 39 شەت مەملەكەتتەن 350 ادام قاتىسادى، - دەپ حابارلايدى اباي-اقپارات.

قۇرىلتايعا قاتىسۋشىلار اراسىندا شىعارماشىلىق، عىلىمي جانە پەداگوگيكالىق زيالى قاۋىم، بيزنەس، سپورت سالالارى، مەملەكەتتىك جانە قوعامدىق ۇيىمدار، باق وكىلدەرى بار. قۇرىلتاي دەلەگاتتارى مەن مەيماندارىنىڭ 80 %-كە جۋىعى بۇل ءىس-شاراعا تۇڭعىش رەت قاتىسۋدا.

قۇرىلتايدىڭ سالتاناتتى اشىلۋى 23 ماۋسىمدا تاۋەلسىزدىك سارايىندا قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆتىڭ، سونداي-اق قر پارلامەنتى سەناتى مەن ءماجىلىسى دەپۋتاتتارىنىڭ، ورتالىق جانە جەرگىلىكتى مەملەكەتتىك ورگاندار باسشىلارىنىڭ، پارتيالار، قوعامدىق بىرلەستىكتەر، ۇلتتىق-مادەني ورتالىقتار باسشىلارىنىڭ قاتىسۋىمەن وتەدى.

قۇرىلتاي اياسىندا ۇلتتىق اكادەميالىق كىتاپحانادا بەلگىلى عالىم-تەولوگ حاليفا التايدىڭ 100 جىلدىعىنا ارنالعان «حاليفا التاي جانە قايتا ورالعان تاريح» اتتى تاقىرىپتا حالىقارالىق عىلىمي-پراكتيكالىق كونفەرەنتسيا وتكىزىلەدى.

ءدىن ىستەرى جانە ازاماتتىق قوعام، ءبىلىم جانە عىلىم، اقپارات جانە كوممۋنيكاتسيالار، مادەنيەت جانە سپورت، دەنساۋلىق ساقتاۋ مينيسترلىكتەرى قۇرىلتايدىڭ شەتەلدىك دەلەگاتتارى ءۇشىن «دوڭگەلەك ۇستەلدەر» وتكىزەدى.

دەلەگاتتار مەن مەيماندار «ەكسپو-2017» حالىقارالىق كورمەسىمەن تانىسادى، ەتنواۋىلدى جانە «استانا وپەرا» وپەرا جانە بالەت تەاترىن بارىپ كورەدى.

قۇرىلتايدىڭ ءباسپاسوز ورتالىعىندا 150-گە جۋىق وتاندىق جانە شەتەلدىك باق وكىلدەرى جۇمىس ىستەيتىن بولادى.

دۇنيەجۇزى قازاقتارىنىڭ قۇرىلتايى 1992 جىلدان بەرى وتكىزىلىپ كەلەدى. قۇرىلتاي سول ۋاقىتتان بەرى الەمنىڭ ءار تۇكپىرىندە تۇراتىن ەتنيكالىق قازاقتاردىڭ بىرەگەي كەزدەسۋ ورنى، وزەكتى ماسەلەلەرىن تالقىلاۋعا ارنالعان ديالوگتىق الاڭ رەتىندە قىزمەت ەتىپ كەلەدى.

اباي-اقپارات