الماتى وبلىسىنىڭ اكىمى اماندىق باتالوۆ ۇلى وتان سوعىسىنىڭ ارداگەرى، ەلباسىنىڭ ۇستازى، ارداقتى اقساقال سەيىتحان يساەۆتى 100 جاسقا تولۋىمەن جانە جەڭىس مەرەكەسىمەن قۇتتىقتادى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

وبلىس اكىمى ا. باتالوۆ اقساقالعا مەملەكەت باسشىسى نۇرسۇلتان ءابىشۇلى نازارباەۆتىڭ قۇتتىقتاۋ حاتىن وقىپ، تابىستادى. پرەزيدەنتتىڭ حاتىندا: «قۇرمەتتى سەيىتحان اعا! 100 جاساعان تورقالى تويىڭىز قۇتتى بولسىن! ءبىر عاسىر ءومىر ءسۇرۋ ەكىنىڭ بىرىنە بۇيىرا بەرمەيتىن بيىك شىڭ. سونىڭ باسىنا شىعۋ جولىندا ءسىزدىڭ عۇمىرىڭىز ءتۇرلى قيىندىقتار مەن قۋانىشتارعا تولى بولدى. ۇلى وتان سوعىسىنا قاتىسىپ، ەل قورعادىڭىز. ونداعان جىلدار بويى مەكتەپتە ۇستاز بولىپ، ەڭبەك ەتىپ، مىڭداعان شاكىرتتەردىڭ جۇرەگىنە ءبىلىم ءنارىن قۇيدىڭىز. سولاردىڭ قاتارىندا ءوزىمنىڭ دە بولعانىمدى ءاردايىم ريزاشىلىقپەن ەسكە الىپ، ايتىپ جۇرەمىن. ەڭ باستىسى، ءسىز ەل تاۋەلسىزدىگىنىڭ كۋاسى بولىپ، ابىز اقساقالىمىزدىڭ ءبىرى رەتىندە وتانىمىزدىڭ كوركەيىپ، نىعايۋىنا ءوز ۇلەسىڭىزدى قوستىڭىز. اۋىرماي امان-ەسەن بولىپ، بۇدان بىلاي دا ءومىردىڭ قۋانىشى مەن قىزىعىنا بولەنە بەرىڭىز»، - دەلىنگەن.  مۇنان سوڭ وبلىس باسشىسى اقساقالعا سىي-قۇرمەت كورسەتىپ، يىعىنا اق شاپان جاپتى.

سەيىتحان احمەتۇلى ءوز كەزەگىندە مەملەكەت باسشىسىنىڭ ساليقالى ساياساتىمەن اعا ۇرپاققا كورسەتىلىپ وتىرعان سىي-قۇرمەت پەن قامقورلىق ءۇشىن ريزاشىلىعىن ءبىلدىردى. وسىنداي قولداۋ شارالارىنىڭ ارقاسىندا ارداگەرلەر ەڭسەسىن تىك ۇستاپ، ومىرلىك تاجىريبەلەرىمەن ءبولىسىپ كەلەدى. «مەن ارقاشان ەلىمىزدىڭ، ونىڭ ىشىندە وبلىسىمىزدىڭ دامۋ باعىتىن باعامداپ وتىرامىن. اتقارىلىپ جاتقان يگى ىستەرگە ارقاشان تىلەكشىمىن. الداعى ۋاقىتتا دا ەلىمىزگە تىنىشتىق، ءوسۋ مەن وركەندەۋ تىلەيمىن»، - دەدى ابىز اقساقال.

اباي-اقپارات