سيريالىق وپپوزيتسيا استاناداعى كەلىسسوزدەردى ۋاقىتشا توقتاتتى
سيريالىق وپپوزيتسيا وكىلدەرى استاناداعى بەيبىت كەلىسسوزدەردەن شىقتى. بۇعان اۋە سوققىلارىنىڭ قايتالانۋى سەبەپ بولدى، دەپ حابارلادى France-Presse (AFP) اقپارات اگەنتتىگى دەرەككوزىنە سىلتەمە جاساپ.
"بۇلىكشىلەر دەلەگاتسياسى بەيبىت تۇرعىنداردى اۋەدەن اتقىلاعانىنا نارازىلىق ءبىلدىرىپ، كەلىسسوزدەردى توقتاتتى. ولار سيرياداعى اتىستى دوعارمايىنشا، كەزدەسۋلەرگە قاتىسپايدى", - دەپ حابارلادى AFP.
قازاقستان سىرتقى ىستەر مينيسترلىگىنىڭ ازيا جانە افريكا دەپارتامەنتىنىڭ ديرەكتورى ايداربەك تۋماتوۆتىڭ مالىمدەۋىنشە، سيريالىق وپپوزيتسيا استاناداعى بەيبىت كەلىسسوزدەردىڭ ەكىنشى كۇنىندەگى كەزدەسۋلەرىنە قاتىسادى.
تۋماتوۆتىڭ ايتۋىنشا، قارۋلى سيريالىق وپپوزيتسيانىڭ وكىلدەرى بۇۇ-نىڭ سيريا جونىندەگى ارنايى وكىلى ستاففان دە ميستۋرامەن جانە اقش دەلەگاتسياسىنىڭ مۇشەلەرىمەن كەزدەسكەن سوڭ، استاناداعى كەلىسسوزدەردى توقتاتقان. ال بەيسەنبى، كەلىسسوزدەردىڭ ەكىنشى كۇنى بۇلىكشىلەر وكىلدەرى "بارلىق كەزدەسۋلەرگە قاتىسادى". ديپلوماتتىڭ حابارلاۋىنشا، استاناداعى كەلىسسوزدەرگە ونداعان وپپوزيتسيالىق توپتىڭ 19 وكىلى كەلدى.
استاناداعى كەزدەسۋلەر 3 مامىردا جابىق ەسىك فورماتىندا ءوتتى. 4 مامىردا جالپى وتىرىس جانە قورىتىندى ءباسپاسوز كونفەرەنتسياسى ۇيىمداستىرىلادى.
اباي-اقپارات
