كەشە مەنەن ءبىر جاس جىگىت: "سوۆەت وكىمەتى كەزىندە سۋ تاسقىنى بولۋشى ما ەدى؟" -دەپ سۇرادى. ايتايىن. كوكتەم ايىندا قار كىرتىكتەنە باستاعاندا سوۆحوز ورتالىعىنان سۋ اپاتىنا بايلانىستى شتاب قۇرىلاتىن. شتابتىڭ توراعاسى سوۆحوز ديرەكتورىنىڭ ءوزى بولادى. شتابتىڭ قۇرامىنا پارتورگتەن باستاپ بارلىق باس ماماندار كىرەتىن.

ورتالىقتا ساقاداي ساي بەس "ك-700" ۋگولنيگىمەن، كۇرەكتەرىمەن دايىن تۇراتىن. سۋ جۇرەتىن ارنالى جولداردى بىلەتىن ماماندار تراكتوريستەرمەن بىرگە قارلى سۋدى ءتىلىپ، ءوز ارناسىنا تۇسىرەتىن. بولىمشەلەردە دە سولاي بولاتىن. ولارعا دا ەكى "ك-700" ۋگولنيگىمەن بەكىتىلەتىن. ءتىپتى اۋدان باسشىلارى ۇلكەن اۆتوجولداردى سۋ الىپ كەتپەۋى ءۇشىن سوۆحوزدان كومەك سۇرايتىن. قازىر تاڭعالام، بۇكىل رەسپۋبليكا بولىپ ءبىر اۋىلدى سۋ اپاتىنان قۇتقارا المايدى. مىنە، ءبىزدىڭ 25 جىلدا جەتكەن جەرىمىز. ءسويتىپ كەلىپ ءبىر جىرتىلامىز-اۋ "دامىعان 30 ەلدىڭ ىشىنە ەندىك" دەپ. قايران قارا حالىقتىڭ قامىن ويلاعان، كەلمەسكە كەتكەن زامان-اي. بۇل كەڭەس زامانىن اڭساۋ ەمەس، سول كەزدەگى قايمانا حالىققا جاساعان جاقسىلىقتاردى اڭساۋ!

ال قازىر قالاي؟ جىلدا وسى ۋاقىتتا سۋ تاسقىنى جىرى باستالادى. پرەمەر-مينيستردەن باستاپ اۋىل اكىمىنە دەيىن دۇرلىگەدى كەلىپ. وتكەن جىلعى "دايىندىقتىڭ" كۇلى كوككە ۇشادى. قايتادان اۋىل-ايماقتى سۋ باسۋ. تاعى دا ۋلاعان-شۋلاعان قايمانا حالىق. ەش دارمەن جوق. قاپتاعان باسشى "كەلەر جىلى قاتىرامىز" دەپ قۇرعاق ۋادەلەرىن بەرىپ كەتەدى. سونىمەن ء"ىس ءبىتتى، قۋ كەتتىدەن" كەيىن اساۋ تابيعات اپاتىنىڭ دا اشۋى باسىلىپ ءوز ارناسىنا تۇسەدى. وسىدان كەيىن "كەلەسى جىلعى سۋ اپاتىنا دايىنبىز" دەگەن ەسەپتەر اۋىلدان اۋدانعا، اۋداننان وبلىسقا، ودان رەسپۋبليكاعا كەتەدى. بۇل بۇگىنگى قاۋقارسىز وكىمەتتىڭ سيقى.

وسىدان كەيىن قالاي ەل بولامىز؟

جۇمابەك تابىن

Facebook-تەگى پاراقشاسىنان