«ساياسات-Monitoring» اكىمدەردىڭ بيىلعى جىلداعى العاشقى رەيتينگىن جاريا ەتتى. بىلايعى جۇرت ءۇشىن ماڭىزى شامالى بۇل سالىستىرمالى تىزىمدە اناۋ ايتقانداي وزگەرىس جوق.

كوش باسىندا استانا اكىمى ادىلبەك جاقسىبەكوۆ تۇر. دۋانباسىنىڭ بۇل ورىنتاقتاعى 100 كۇن ىشىندە جاساعان جۇمىسى... ءجىپ ەستىرمەيدى ەكەن. ونىڭ ىسىنە وڭ باعا بەرۋشىلەر باس قالاداعى كوممۋنالدىق قىزمەتتىڭ جاقسارعانىنا باسا نازار اۋدارىپتى. باسقا پروبلەما جوق-مىس. سوعان قاراعاندا، تاسماعامبەتوۆ تاستاي ەتىپ كەتكەن باسقا شارۋالاردىڭ جايى سول كۇيىندە تۇرعان بولۋى كەرەك...

ەكىنشى ورىندا – احمەتجان ەسىموۆ. جالپى، اكىمنىڭ ءىسىن ەكشەۋدە نەگىزگى كريتەريلەرگە كوز جۇگىرتسەڭىز، سماعۇلۇلىنىڭ جاساعان جۇمىسى جاقسىبەكوۆتى جەردە قالدىرۋى ءتيىس ەدى... ەسىموۆتىڭ باقانداي 3 جىلعا باعىتتالعان «داعدارىسقا قارسى» باعدارلاماسىن قابىلداۋى ۇكىمەتتى عانا ەمەس، قوعامدى دا قۋانتىپ وتىر.

اسقار مىرزاحمەتوۆ – ءۇشىنشى ورىندا! ايىبى – قازاققا تىم جاقىن شەنەۋنىك دەمەسەڭىز، مىرزاحمەتوۆ سوزىمەن دە، ىسىمەن دە ەلگە سۇيكىمدى قالپىنان اينىعان ەمەس. ونى كوشباسشىلىق ورىنعا قويۋعا سول ۇلتجاندىلىعى كەدەرگى بولعان شىعار... ايتپەسە، ىسكەرلىگى مەن وبلىستىڭ ەكونوميكالىق ورلەۋى بۇل ايدا دا قامشى سالدىرمايدى.

رەيتينگتىڭ باستاپقى ۇشتىگىنىڭ كوشباسشىلارى وسىلار. بۇدان كەيىنگى بەستىكتىڭ ىشىنە كىرۋ كورسەتكىشى بىلاي ورنالاسقان:

4-ورىندا قىزىلوردا وبلىسىنىڭ اكىمى قىرىمبەك كوشەرباەۆ;

5-ورىندا پاۆلودار وبلىسىنىڭ اكىمى قانات بوزىمباەۆ;

ال، باسقا ايماق باسشىلارى تيىسىنشە ورىنداردى ءوزارا يەلەنگەن ەكەن:

اتىراۋ وبلىسىنىڭ اكىمى باقتىقوجا ىزمۇحامبەتوۆ;

اقمولا وبلىسىنىڭ اكىمى سەرگەي كۋلاگين;

جامبىل وبلىسىنىڭ اكىمى كارىم كوكىرەكباەۆ;

الماتى وبلىسىنىڭ اكىمى اماندىق باتالوۆ;

ماڭعىستاۋ وبلىسىنىڭ اكىمى اليك ايدارباەۆ;

سولتۇستىك قازاقستان وبلىسىنىڭ اكىمى ەرىك سۇلتانوۆ;

اقتوبە وبلىسىنىڭ اكىمى ارحيمەد مۇحامبەتوۆ.

باعالاۋعا الىنعان اكىمدەر اراسىنداعى سۋ جاڭا باسشى – شىعىس قازاقستان وبلىسىنىڭ اكىمى دانيال احمەتوۆتىڭ رەيتينگى ەسەپكە كىرمەسە، ءتىزىمنىڭ اۋتسايدەرلەرى بولىپ قاراعاندى وبلىسىنىڭ اكىمى نۇرمۇحامبەت ابدىبەكوۆ، قوستاناي وبلىسىنىڭ اكىمى نۇرالى سادۋاقاسوۆ جانە باتىس قازاقستان وبلىسىنىڭ اكىمى نۇرلان نوعاەۆ اتانعان.

اباي.kz