بيىل قازاق حاندىعىنىڭ 550 جىلدىعى. وسى مەرەيتويعا بايلانىستى تاريحي-درامالىق تەلەسەيال كورەرمەنگە ۇسىنىلادى. باسىندا 20 سەريا بولادى دەپ جوسپارلانسا، كەيىننەن 10 سەريا بولىپ بەكىتىلدى. ال، 10 سەريالى جۇمىس رەجيسسەر رۇستەم ابدىراشەۆكە سەنىپ تاپسىرىلدى.

«ش.ايمانوۆ اتىنداعى «قازاقفيلم» اق رۇستەم ابدىراشەۆتىڭ جۇمىس اتاۋى «قازاق حاندىعى» اتتى تاريحي-درامالىق تەلەۆيزيالىق سەريالدىڭ تۇسىرىلىمىنە قاتىسۋعا كاستينگ جاريالايدى. بۇل تۋرالى قازاقستان رەسپۋبليكاسىنىڭ مادەنيەت جانە سپورت مينيسترلىگى حابارلايدى.

كاستينگكە سىرتقى كەلبەتى ازيالىق تيپكە جاتاتىن، سپورتتىق دەنە ءبىتىمى بار، بويى 170 سم كەم ەمەس، 17 جانە 45 جاس ارالىعىنداعى ەر ادامدار قاتىسا الادى.

سونىمەن قاتار سەريال تۇسىرىلىمىنە 17 مەن 60 جاس ارالىعىنداعى ەر جانە ايەل ادامدار قاجەت.

ۇمىتكەرلەردىڭ اكتەرلىك جۇمىس تاجىريبەسى بولعانى ابزال، سونداي-اق، كاستينگتىڭ مىندەتتى شارتى - قازاق ءتىلىن مەڭگەرىپ، اتپەن سالت جۇرە بىلۋلەرى قاجەت.

ىرىكتەۋگە قاتىسام دەۋشىلەر ءوز فوتوسۋرەتتەرى مەن ساۋالنامالارىن kaz.hanstvo@mail.ru ەلەكتروندىق پوشتاسىنا جىبەرە الادى.

فوتوسۋرەتتەرگە قويىلاتىن شارتتار: بەت-الپەتىنىڭ انفاس جانە پروفيلدە تۇسىرىلگەن ورتا جانە ءىرى پلانداعى سۋرەتى، بويىنىڭ سۋرەتى.

ساۋالنامادا اتى-ءجونى، تەگى، تۋىلعان جىلى، بويىنىڭ كولەمى، سالماعى، بايلانىس تەلەفوندارى كورسەتىلۋى ءتيىس.

قۇجاتتاردى كەلەسى مەكەن-جاي بويىنشا جىبەرۋگە دە بولادى: الماتى ق.، ءال-فارابي كوش.، 176, «قازاقفيلم» كينوستۋدياسى، 272-ءشى كاب.

«ستالينگە سىيلىق»، «قۇراق كورپە»، «ەلباسى جولى» (كينوەپوپەيا) فيلمدەرىنىڭ رەجيسسەرى رۇستەم ابدىراشەۆ قازاق حاندىعى تۋرالى ون سەريالى كوركەم ءفيلمدى تۇسىرەدى. 

بۇعان دەيىن مادەنيەت جانە سپورت ءمينيسترى ارىستانبەك مۇحامەديۇلى فيلم العاشقى جوسپارلاعاننان ەكى ەسەگە، ياعني 10 سەرياعا دەيىن قىسقارعانىن، فيلم جانىبەك پەن كەرەي بيلىگى زامانىنان باستاپ كەنەسارى حانعا دەيىنگى كەزەڭدى قامتيتىنىن ايتقان. بۇدان وزگە، كينو تۇسىرۋگە اقش پەن قىتاي كينوكومپانيالارى كەڭەسشى رەتىندە شاقىرىلاتىنى حابارلانعان. ءفيلمدى 2015 جىلدىڭ سوڭىنا دەيىن ەكرانعا شىعارۋ جوسپارلانىپ وتىر.

سونداي-اق، كوپ سەريالى تاريحي تۋىندىنىڭ ستسەناريىن جازۋعا بەلگىلى جازۋشى سماعۇل ەلۋباەۆ پەن تيمۋر جاقسىلىقوۆتىڭ شاقىرىلعانىن جاقسى بىلەسىزدەر. كونسۋلتانت رەتىندە «شىڭعىس حان» ءفيلمىنىڭ ستسەناريىن جازعان مامان دا شاقىرىلادى.

جالپى، قازاقستاندا ەڭ ءبىرىنشى رەت وسىنداي اۋقىمدى تاريحي سەريال قولعا الىنىپ وتىر. ۇلكەن جاۋاپكەرشىلىك پەن ەل تاريحىن قامتيتىن كارتينا كوپشىلىكتىڭ كوڭىلىنەن شىعۋ ءۇشىن ساپالى ءتۇسىرىلىم جۇمىستارىن تالاپ ەتەدى.

اباي-اقپارات.

دەرەككوز: http://el.kz/