لينگۆيستيكالىق كوميسسيا بۇگىن سىناقتىڭ قورىتىندىسى بويىنشا، پرەزيدەنتتىككە ءوزىنىڭ كانديداتۋراسىن ۇسىنعان ءۋاليحان قايساروۆقا: «مەملەكەتتىك ءتىلدى ەركىن مەڭگەرمەگەن» دەگەن باعا بەردى. كوميسسيا توراعاسى مىرزاتاي جولداسبەكوۆ ۋ. قايساروۆتىڭ «تمد: تاريحى جانە بۇگىنى» دەگەن تاقىرىپتى تۇسىنبەگەنى بىلاي تۇرسىن، جۇمىستى جازۋ بارىسىندا 23 قاتە جىبەرگەنىن ءمالىم ەتتى. سونىڭ ىشىندە، ەملەدەن – 5, تىنىس بەلگىلەرىنەن – 11, ستيلدىك تۇرعىدان – 7 قاتە جىبەرىلگەن. تاپسىرمانىڭ تاقىرىبى اپ-انىق بولعانىمەن، سىناق تاپسىرۋشى رەسەيگە بوداندىق، تاۋەلسىزدىك تاعىلىمى تۋرالى ويلارىن قاعازعا ءتۇسىرىپتى.

ەكىنشىدەن، ءۋاليحان ءابىشۇلى جازۋشى ءىلياس ەسەنبەرليننىڭ «الماس قىلىش» رومانىنان ءۇزىندى وقىعان ساتتە ءوزى وقىعان ءماتىندى تۇسىنبەي، اڭگىمە نە تۋرالى بولعانىن بىلمەي دال بولىپتى. كوميسسيا توراعاسى اشىق ايتقانداي، ۇمىتكەر قازاق جازۋشىسى شىعارمادا قولدانعان «جىلىشىراي»، «تارتۋ-تارالعى»، «قىرعي-قاباق»، «سويىلىن سوعۋ» دەگەن سوزدەردىڭ ماعىناسىن ءتۇسىندىرىپ بەرە الماعان. ء«بىر قىزىمنان ءبىر قىزىم ءام سوراقى» دەپتى بىرەۋ باياعىدا. سول ايتقانداي، ءۋاليحان ءابىشۇلىنىڭ ءبىر جاۋابىنان ءبىر جاۋابى سوراقى بولىپ شىققانىن نەسىنە جاسىرايىق. ماسەلەن، ول اعىمداعى جىلدىڭ 6 ناۋرىزىندا ورتالىق سايلاۋ كوميسسياسىنا كەلىپ، ءوز قولىمەن جازعان وتىنىشىندە: «باسقا مەملەكەتتىڭ ازاماتتىعىندا تۇراسىز با؟» دەگەن سۇراققا: «تۇرامىن» دەپ جازىپتى. ايتپاقشى، سىناقتان سوڭ وسى ساۋالدى ۇمىتكەردىڭ وزىنە قويدىق. «بۇل ساۋال ماعان قازاقتان رەسپۋبليكاسىندا تۇراسىز با، تۇرمايسىز با؟ دەگەندەي كورىندى. ارينە، تۇرامىن دەپ جازدىم. ول تەحنيكالىق قاتە بولۋى ابدەن مۇمكىن. ويتكەنى، مىناداي ۇلكەن دوداعا تۇسكەن كەزدە جۇيكەڭىز دە قوزعالادى. ءبارىمىز ادامبىز» دەپ ەكىۇشتىلاۋ جاۋاپ قاتتى.

سىناقتان وڭباي سۇرىنگەن ۋ. قايساروۆ مىرزا ءوز قولىمەن جازعان ومىرباياندىق دەرەكتەرىندە دە وتە دورەكى قاتەلەر جىبەرگەن. «مىسالى، ءسىز قر-نىڭ اۋماعىندا تۇرامىن دەگەنگە تۋعاننان (؟) تۇرامىن دەپ جازىپسىز. ودان كەيىن ەڭ سوڭىندا ءوتىنىشتى تولتىرعان كۇنىڭىزدى 6 ناۋىرىز 2015 جىل دەپ قاتە جازاسىز» دەپ م. جولداسبەكوۆ ۇمىتكەردىڭ قازاق تىلىندە ساۋاتتى جازا المايتىنىن اشىق ايتتى. ال ءۇشىنشى تاپسىرمادا قازاقتىڭ ءبىرتۋار باتىر ۇلى باۋىرجان مومىشۇلىنىڭ قاناتتى ءسوزى بەرىلگەن. سىناق تاپسىرۋشى ونى دا تۇسىنبەي، مۇلدەم باسقا نارسە ايتىپ كەتىپتى. «ۇيالعان تەك تۇرماس» دەگەندەي، سىناق سوڭىنان وتكەن بريفينگتە ءۋاليحان قايساروۆ: «مەنىڭ بەرگەن جاۋاپتارىم كوميسسيا مۇشەلەرىنە ۇناعان جوق» دەپ اقتالعانسىدى. ءتىپتى، ءبىرىنشى تاپسىرماداعى «تمد» دەگەن جازۋدى كىشى ارىپتەرمەن ادەيى جازىپ قويىپتى دەپ كىنالادى. قازاق مۇندايعا «جەڭىلگەن كۇرەسكە تويمايدى» دەمەۋشى مە ەدى؟!.

جاندوس جۇمابەكۇلى.