جيناقتاۋ شوتىن اشىپ، بىردەن شارتتىق سومانىڭ 10%-ىن دەپوزيتكە سالعان ادامدارعا كوميسسيا تولەمەي-اق دەپوزيت اشۋعا مۇمكىندىك بەرىلىپ وتىر. ال العاشقى سالىم رەتىندە شارتتىق سومانىڭ 5%-ىن شوتىنا سالعان كليەنتتەرگە كوميسسيالىق الىمعا  50% جەڭىلدىك بەرىلەدى.

تۇرعىن ءۇي قۇرىلىس جيناق بانكىنىڭ ءباسپاسوز قىزمەتىنىڭ ايتۋىنشا، 0,55% كولەمىندە جيناق شارتىن اشۋعا الىناتىن قاتارداعى كوميسسيالىق الىم ۇستالىنادى. بانك ەرەجەسى بويىنشا، ول 500 اەك-تەن از بولماۋى ءتيىس. بۇل – 1 ميلليونعا جۋىق تەڭگە. وسىلايشا، قازىر بانك سالىمشىلارىنا 2,5 مىڭنان 5 مىڭ تەڭگەگە دەيىن ۇنەم جاساۋىنا مۇمكىندىك تۋىپ وتىر.

قتقجب-نىڭ ستاتيستيكالىق مالىمەتتەرىنە سۇيەنسەك، سالىمشىنىڭ شوتىندا جيناقتاۋدى قالايتىن ورتاشا قاراجاتى – 2,2 ميلليون تەڭگە. بۇل – دەپوزيت اشۋ كەزىندە كوبىرەك ۇنەمدەۋگە بولادى دەگەن ءسوز.

تۇرعىن ءۇي قۇرىلىس جيناق بانكىنىڭ «دەپوزيت تولتىرۋعا بونۋس» اكتسياسى ءساۋىر ايىنان باستالدى. ءالى 4 ايعا دەيىن جالعاسادى. وسى كەزەڭ ىشىندە شارتتىق سومانى كوبەيتكىسى كەلەتىندەر دە وسى اكتسيانى پايدالانا الادى.

تۇرعىن ءۇي قۇرىلىس جيناق بانكى وكىلدەرىنىڭ ايتۋىنشا، كەز كەلگەن بولىمدە شوت اشۋىڭىزعا نەمەسە ۇيىڭىزگە نەمەسە كەڭسەڭىزگە شتاتتان تىس اگەنت-كەڭەسشى شاقىرۋىڭىزعا بولادى. دەپوزيت اشۋ ءۇشىن تەك جەكە كۋالىگىڭىزدى ۇمىتپاساڭىز بولعانى.

بانك قولايلى تاريفتىك باعدارلامالار ۇسىنادى. ولار جيناقتاۋ مەرزىمىنە جانە جىلدىق 3,5-تەن 9,5%-عا دەيىنگى پايىزدىق مولشەرلەمەلەرىنە قاراي ەرەكشەلەنەدى.  سوسىن، دەپوزيتى بولسا، قتقجب سالىمشىلارى ءتيىمدى تالاپتارمەن جىلجىمايتىن مۇلىك ساتىپ الادى نەمەسە «قولجەتىمدى تۇرعىن ءۇي – 2020» باعدارلاماسىنا قاتىسا الادى.

ەستەرىڭىزگە سالا كەتەيىك، «قازاقستاننىڭ تۇرعىن ءۇي قۇرىلىس جيناق بانكى» اق –  «بايتەرەك» ۇلتتىق باسقارۋشى حولدينگى» اق ەنشىلەس كومپانياسى.

اباي-اقپارات