رەسەي پرەزيدەنتى پۋتين 2014 جىلى 7 654 042 رۋبل (151,5 مىڭ دوللار) تابىس تاۋىپتى. بۇل تۋرالى كرەملدىڭ سايتى جاريالاعان كىرىس تۋرالى دەكلاراتسياعا سىلتەمە جاساپ BBC حابارلادى. ءپۋتيننىڭ بۇل تابىسى 2013 جىلعىدان ەكى ەسە اسىپ تۇسكەن.

دەكلاراتسياداعى مالىمەتكە ساي، رەسەي باسشىسى 1500 شارشى مەتر جەر تەلىمىنە، 77 شارشى مەتر گاراجدى پاتەرگە يەلىك ەتەدى. بۇدان سىرت، پۋتين يەلىگىندە 153,7 شارشى مەتر اۋماقتى پايدالانۋداعى ءۇي دە بار كورىنەدى.

سونداي-اق، ءپۋتيننىڭ ءۇش جەكە كولىگى بار، كولىكتىڭ ۇشەۋى دە رەسەيدىڭ وتاندىق ءونىمى: گاز م21, گاز م-21-ر جانە نيۆا ماركالى ماشينالار.

رەسەي پرەمەرى ديميتري مەدۆەدەۆتىڭ دە 2014 جىلعى كىرىسى ودان بۇرناعى جىلعىدان ەكى ەسەگە وسكەن. ول بىلتىر  8,052 ميلليون رۋبل (159,4 مىڭ دوللار) تابىس تاۋىپتى.

سارسەنبىدە جاريالانعان كرەمل سايتىندا جاريالانعان مالىمەتتە پرەزيدەنت اكىمشىلىگىنىڭ قىزمەتكەرلەرىنىڭ تابىسى دا كورسەتىلگەن.

تمد، ابحازيا جانە وڭتۇستىك وسەتيا مەملەكەتتەرىمەن الەۋمەتتىك-ەكونوميكالىق ارىپتەستىك باسقارماسىنىڭ باستىعى ولەگ گوۆورۋن 2014 جىلى بارىنەن كوپ تابىس تاپقان. ونىڭ كىرىسى 114 ميلليون رۋبلدەن (2,3 ميلليون دوللار) اسىپ جىعىلادى. ول جۇبايى ەكەۋى بەس جەر تەلىمى مەن ءۇيدىڭ، بەس پاتەردىڭ جانە ءۇش اۆتوكولىكتىڭ يەسى بولىپ تابىلادى ەكەن.

ال، تابىسى جاعىنان تىزىمدە ەكىنشى تۇرعان ادام – پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى ۆياچەسلاۆ ۆولودين. ول 63 ميلليون رۋبلگە(1,3 ميلليون دوللار) جۇمىس ىستەگەن.

ەستەرىڭىزگە سالساق, وسىدان ءبىر اي بۇرىن CNN Money جاريالاعان الەم ليدەرلەرىنىڭ تابىسى تۋرالى مالىمەتتە رەسەي پرەزيدەنتى  ۆلاديمير ءپۋتيننىڭ جىلدىق تابىسى 136 مىڭ دوللار ەكەنى كورسەتىلگەن.

ال، كرەمل سايتى بيىلعى ناۋرىز ايىنىڭ باسىندا رەسەي باسشىسىنىڭ ءوز جالاقىسىن ون پايىزعا قىسقارتقانىن جاريالادى.

نۇرعالي نۇرتاي

Abai.kz