2015 جىلدىڭ 22 ساۋىرىندە استانادا «قازاقيا-2015» بلوگ-ساپار بايقاۋى قاتىسۋشىلارى مەن جۇلدەگەرلەرىن سالتاناتتى ماراپاتتاۋ ءراسىمى ءوتتى.ەستەرىڭىزگە سالا كەتەيىك، بلوگ-بايقاۋدىڭ ىرىكتەۋ مەرزىمى – 26 ناۋرىز بەن 10 ءساۋىر، بلوگ-ساپار ۋاقىتى 11–22 ءساۋىر ارالىعىن قامتىعان بولاتىن. بلوگ-ساپار مارشرۋتى مىنا ستانتسيالاردى قامتىدى: الماتى، سارىوزەك، ۇشتوبە، اياگوز، ريددەر، سەمەي، اقسۋ، ەكىباستۇز، تەمىرتاۋ، جاڭاارقا، جەزقازعان، استانا.

بلوگ-بايقاۋعا قاتىسۋشىلار الەۋمەتتىك جەلىلەر ارقىلى ىرىكتەلدى، 50-گە جۋىق ۇمىتكەردىڭ اراسىنان بلوگ-ساپار مارشرۋتى بويىنشا ەڭ تارتىمدى جوسپار ۇسىنا العان مىنا بلوگەرلەر ىرىكتەلدى: اقبوتا مۇسابەكقىزى، امانبەك ماعزۇمحان، امانگۇل مادەتحانقىزى، بيجان ساديبەكوۆ، مەيىرمان ساۋرانبەك، نۇربەك بەكباۋ، نۇرلىحان قالقامانۇلى، سەرىكبول حاسان، ەلۆيرا ەرعالينا. 12 كۇندە 12 ستانتسيانى ساپارلاپ، از ۋاقىتتا ساپالى ءونىم ۇسىنۋعا تىرىسقان بلوگەرلىك توپتىڭ جۇمىسىن اسحات ەركىمباي، ارشات ورازوۆ، تيمۋر بەكتۇر، راحات جاقسىباي، وركەن كەنجەبەك سياقتى، قۇرامىندا تانىمال بلوگەرلەر مەن باستاماشىل توپتىڭ وكىلدەرى بار قازىلار القاسى باعالادى.

بايقاۋ ناتيجەسى كەلەسىدەي:

1-ورىن. نۇربەك بەكباۋ – 500 مىڭ تەڭگە

2-ورىن. ەلۆيرا ەرعالينا – 300 مىڭ تەڭگە

3-ورىن. اقبوتا مۇسابەكقىزى – 200 مىڭ تەڭگە

قازىلار القاسىنىڭ ايتۋىنشا، ن.بەكباۋدىڭ «25 جىلدا بىردە-ءبىر ءۇي سوعىلماعان قالا»، «تەمىر جولدىڭ تامىرشىسى»، «اياگوز: نەگە ابىلاي بۇل ولكەنىڭ اتىن وزگەرتپەدى؟»، «ابايدى ساباعان قازاقتىڭ قولىن سۇيگىم كەلەدى»، «وسىدان كەيىن ولار جىلقىنى، ءبىز ولاردى كورمەدىك» دەگەن سياقتى جازبالارى تانىمدىق، ساراپتامالىق سيپاتىمەن ەرەكشەلەنىپ، قارا ءۇزىپ شىققان.

جوبانىڭ ماقساتى – الەۋمەتتىك جەلى بەلسەندىلەرىنىڭ كوزىمەن قازاقستاندى جاڭا قىرىنان تانىتۋ، قازاق ينتەرنەت كەڭىستىگىن ساپالى ماتىندىك، بەينە، فوتو كونتەنتپەن تولىقتىرۋ ەكەنى ايتىلعان. بلوگ-ساپار تابىستى ءوتىپ، جولجازبالار جارىسىنا تۇسكەن بلوگەرلەر توبىنىڭ جۇمىسى قازاقتىلدى الەۋمەتتىك جەلىدە ايتارلىقتاي رەزونانس تۋدىردى دەپ ايتا الامىز. ولار بلوگ-ساپار بارىسىندا 300-گە جۋىق جازبا جاريالادى. اتالعان جازبالارعا 4000-عا جۋىق قولدانۋشىلار پىكىر ءبىلدىردى. قامتۋ اۋديتورياسى – 100 000.

جوبا ۇيىمداستىرۋشىلارى: «As club» استانالىق جۋرناليستەر كلۋبى مەن باستاماشى توپ.

جوباعا «التەل» كومپانياسى جەتەكشىلىك جاسادى.

اباي-اقپارات