حالىقارالىق سيمپوزيۋم ونىڭ بۇگىنى مەن كەلەشەگىن تالقىعا سالۋدا 

4-ءشى مامىر كۇنى احمەت ياساۋي ۋنيۆەرسيتەتىندە «ماتۋريديلىكتىڭ وتكەنى، بۇگىنى جانە كەلەشەگى» اتتى حالىقارالىق سيمپوزيۋمى باستالدى. گۋمانيتارلىق عىلىمدار فاكۋلتەتى، ء«دىنتانۋ» كافەدراسى جانە ەۋرازيا عىلىمي-زەرتتەۋ ينستيتۋتى بىرلەسە وتىرىپ ۇيىمداستىرعان سيمپوزيۋم بۇگىن اياقتالادى.

سيمپوزيۋم ادەتتەگىدەي قازاقستان مەن تۇركيا مەملەكەتىنىڭ انۇرانىمەن باستالدى. اتاۋلى ءىس-شارانى اشىپ بەرگەن حقتۋ دامۋ جانە قارجىلاندىرۋ جونىندەگى ۆيتسە-پرەزيدەنت م.نۇرسوي جانە عىلىمي جانە يننوۆاتسيالىق ىستەر جونىندەگى ۆيتسە-پرەزيدەنت ت.رايمبەرديەۆ كەلگەن قوناقتارعا العىسىن بىلدىرە وتىرىپ قاتىسۋشىلارعا ساتتىلىك تىلەدى. سيمپوزيۋم كوورديناتورى پروفەسسور سونمەز كۋتلۋ ات سالىسىپ قول ۇشىن بەرگەن ۇيىمداستىرۋشىلارعا، شەتەل جانە قازاقستاننان كەلگەن قوناقتارعا العىسىن ءبىلدىرىپ، سيمپوزيۋمنىڭ نەگىزگى ماقساتىنا توقتالىپ: «جالپى يسلام ويلاۋ جۇيەسىندە (تۇسىنىگىندە) ونى ءتۇسىنۋ، پايىمداۋ جانە ونىڭ شارتتارىن ورىنداۋعا قاتىستى ءارتۇرلى تۇسىنىكتەر پايدا بولدى. بۇلاردىڭ ءبىر بولىگى پروبلەمالاردى شەشۋدە كۇش قولدانۋعا، ال ءبىر بولىگى اقىل-وي تارازىسىنا سالۋعا، ەندى ءبىر بولىگى سالت-داستۇرگە سۇيەنۋگە، ال كەلەسى ءبىر بولىگى ميستيكالىق تاجىريبەگە سۇيەنۋگە تىرىستى. ءابۋ حانيفا مەن يمام ماتۋريدي مۇسىلمانداردىڭ پروبلەمالارىن شەشۋدە اقىل-وي تارازىسىنا سۇيەنۋ ءتاسىلىن العا تارتتى. سول سەبەپتەن ولاردى اقىل-ويدىڭ جاقتاستارى دەپ اتادى»، - دەدى.

اتالمىش ءىس-شاراعا تۇركيا، تاتارستان، قىرعىزستان، باشقۇرتستان، وزبەكستان، تۇركمەنستان، ازەربايجان جانە ەلىمىزدەگى ءتۇرلى ۇيىمدار مەن جوو-دان پروفەسسورلار، قوناقتار كەلدى.

سيمپوزيۋم مودەراتورى ۋنيۆەرسيتەت ۆيتسە-پرەزيدەنتى، پروفەسسور ت.رايىمبەرديەۆ پرەزيديۋم مۇشەلەرىن تانىستىرا كەتتى. وقو ىشكى ساياسات جانە ءدىن ىستەرى باسقارماسىنىڭ ءبولىم باسشىسى اڭسار وسەرباەۆ، قر مادەنيەت جانە سپورت مينيسترلىگى، ءدىن ىستەرى كوميتەتى دىنتانۋلىق ساراپتاما باسقارماسىنىڭ باسشىسى، تەولوگيا دوكتورى مىرزا بالعابەك، تاتارستان مۇسىلماندارى ءدىني باسقارماسىنىڭ توراعاسى، باس ءمۇفتيى كاميل ساميگۋللين، باشقۇرتستان مۇسىلماندار ءدىني باسقارماسىنىڭ وكىلى ارتۋر احمەروۆ، تۇركيا، يزمير قالاسى، دوكۋز ەيليۋل ۋنيۆەرسيتەتى،  ءدىنتانۋ فاكۋلتەتى پروفەسسور حانيفي ءوزجان، ل.گۋميلەۆ اتىنداعى ەۆرازيا ۇلتتىق ۋنيۆەرسيتەتى ءدىنتانۋ كافەدراسىنىڭ پروفەسسورى دوساي كەنجەتاي، قىرعىستان رەسپۋبليكاسى وش مەملەكەتتىك  ۋنيۆەرسيتەتى، تەولوگيا فاكۋلتەتىنىڭ پروفەسسورى زايلابيددين اجيماماتوۆ وسى حالىقارالىق سيمپوزيۋمعا شاقىرعاندارى ءۇشىن العىسىن ءبىلدىردى جانە  يمام ماتۋريدي مەن ونىڭ ماتۋريديلىك مەكتەبى تۋرالى توقتالا كەتتى.

بايانداماشىلار ۇلى عۇلاما يمام ءماتۋريدىڭ ءومىرى، عىلىم بىلىمگە قوسقان ۇلەستەرى، سامارحاند قالاسىندا يمام ماتۋري تاراپىنان نەگىزى قالانىپ، كەيىننەن ونىڭ ءىزباسارلارى ارقىلى تۇركى حالىقتارىنىڭ اراسىنا تاراعان ماتۋريديلىك جولى تۇركى حالىقتارىنىڭ ءدىني، قوعامدىق جانە مادەني بىرلىگى جولىندا ماڭىزدى رول اتقارعاندىعى،  

ءماتۋريديدىڭ ويلاۋ جۇيەسىنە جالپى شولۋ، ماتۋريدي مۇراسىنىڭ قازاقستاننىڭ بولاشاعى تۇرعىسىنان ماڭىزدىلىقتارى تۋرالى بايانداما جاسادى.

ءۇش كۇنگە سوزىلاعان حالىقارالىق سيمپوزيۋم ءۇش تىلدە ءوتىپ جاتىر: قازاقشا، تۇرىكشە جانە اعىلشىن تىلدەرىندە.

اباي-اقپارات