ايگىلى ريو وليمپياداسىنىڭ چەمپيوندارى دميتري بالاندين مەن نيدجات راحيموۆ قازاقستان رەسپۋبليكاسىنىڭ ۇلتتىق ۇلانى «وڭتۇستىك» وڭىرلىك قولباسشىلىعى سپورت كومانداسىنىڭ قۇرامىنا شاقىرىلدى- - دەپ حابارلايدى اباي-اقپارات.

ەكى ءجۇز مەتر قاشىقتىققا جۇزۋدەن وليمپيادانىڭ  التىن جۇلدەگەرى دميتري بالاندين مەن زىلتەمىردى جۇلقي كوتەرۋدەن وزىنە 70 كەلى سالماقتا قارسىلاستارىن شاق كەلتىرمەگەن زىلتەمىرشى نيدجات راحيموۆ الداعى ۋاقىتتا ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى 5571 اسكەري ءبولىمى اتىنان «دينامو» دەنە شىنىقتىرۋ جانە سپورت قوعامىنىڭ قاتارىندا ونەر كورسەتەتىن بولادى.

اتالمىش وقيعا بۇگىن جاس شاقىرىلىم جاۋىنگەرلەرىن ۇلتتىق ۇلان قاتارىنا اسكەرگە سالتاناتتى تۇردە شىعارىپ سالۋ كەزىندە بولدى. الماتى قالالىق قورعانىس ىستەرى جونىندەگى دەپارتامەنتىنىڭ قالالىق جيناقتاۋ پۋنكتىنىڭ الاڭىندا العاش رەت ساپ تۇزەگەن جۇزگە جۋىق كۇزگى شاقىرىلىم جاۋىنگەرلەرى قاتارلارىنا وزدەرىمەن بىرگە يىق تىرەسكەن وليمپيادانىڭ قوس تارلانىن كورگەندە ەرەكشە سەزىمگە بولەندى.

سالتاناتتى ءىس-شاراعا ۇلتتىق ۇلان ارداگەرلەرى وتستاۆكاداعى گەنەرال-مايور يۆان كوماروۆ، وتستاۆكاداعى پولكوۆنيك گەننادي فالەەۆ جانە «وڭتۇستىك» وڭىرلىك قولباسشىلىعى تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى پولكوۆنيك نيازتاي الكەشەۆ قاتىسىپ، وتان الدىنداعى بورىشىن وتەۋگە اتتانعالى تۇرعان جاۋىنگەرلەردىڭ الداعى اسكەري قىزمەتتەرىنە ساتتىلىك تىلەپ، اسكەري انتتارىنا ادال بولۋعا شاقىردى. 

اسكەريلەردىڭ جالىندى سوزدەرىنەن كەيىن جاۋىنگەرلەردىڭ اراسىنان ساپتىق ادىممەن شىققان دميتري بالاندين مەن  نيدجات راحيموۆ مىنبەرگە كوتەرىلىپ، جاس ساربازدارعا يگى تىلەكتەرىن ءبىلدىرىپ، اق جول تىلەدى. ءوز سوزىندە دميتري بالاندين: «قۇرمەتتى جاس ساربازدار، ەل قورعاۋ قاشان دا ابىرويلى ءىس بولعان. سىزدەرگە وتانىمىز ۇلكەن جاۋاپكەرشىلىكتەر ارتۋدا. وزدەرىڭە مىندەتتەلگەن تاپسىرمالار مەن بۇيرىقتاردى ءمىنسىز ورىنداپ، اسكەري انتتارىڭا ادال بولىڭدار. اسكەري قىزمەتتىڭ قيىندىقتارىنا مويىماي تاباندىلىقپەن توتەپ بەرەتىندەرىڭە مەن، وليمپيادا چەمپيونى دميتري بالاندين كامىل سەنەمىن!» – دەپ اعىنان جارىلدى. 

ءىس-شارا 5571 اسكەري ءبولىمى وركەسترىنىڭ سۇيەمەلدەۋىمەن كونتسەرتتىك باعدارلاماعا ۇلاسىپ، ارتىنشا جاس ساربازدار وتان الدىنداعى كونستيتۋتسيالىق بورىشىن وتەۋ ءۇشىن تەمىرجول ۆوكزالىنا جول تارتتى.

 اتاپ وتكىمىز كەلەتىنى، بۇگىن اتتانعان جاس ساربازدار استانا قالاسىندا وتەتىن ساياسي، سپورتتىق-بۇقارالىق كولەمدى ءىس-شارالار كەزىندە، ونىڭ ىشىندە الداعى ۋاقىتتا وتەتىن «ەكسپو-2017» حالىقارالىق كورمەسىندە قوعامدىق ءتارتىپ پەن قاۋىپسىزدىكتى قامتاماسىز ەتەتىن بولادى.

بۇنداي كەزدەسۋلەردىڭ باستى ماقساتى اسكەرگە شاقىرۋشىلاردىڭ جۇرەكتەرىندە وتان قورعاۋعا دەگەن پاتريوتتىق سەزىمدەرىن وياتىپ، وتان الدىنداعى بورىشىن ادال وتكەرىپ كەلۋگە جىگەرلەندىرۋ بولىپ تابىلدى.

Abai.kz