وڭتۇستىك قازاقستان وبلىسىندا اۋىل شارۋاشىلىعى سالاسىنداعى تيىمدىلىكتى ارتتىرۋ ماقساتىندا سوڭعى جىلدارى ىرىلەندىرۋ ساياساتى قارقىندى جۇرگىزىلىپ كەلەدى،-دەپ حابارلايدى «اباي اقپارات» پورتالى.

-مۇنىڭ الىناتىن ءونىم كولەمىن ارتتىرۋعا تيەتىن ىقپالىمەن قاتار شارۋانى دوڭگەلەتۋگە قولقابىس جاسايتىن نەسيەگە قول جەتكىزۋگە دە جول اشادى، دەيدى وقو اۋىلشارۋاشىلىق باسقارماسىنىڭ ماماندارى.

جەلتوقسان ايىنداعى قورىتىندى دەرەكتەرگە نازار اۋدارساق، بۇگىنگى كۇنى وڭتۇستىك قازاقستان وبلىسىندا جاڭادان 15 مىڭنان استام ۇساق شارۋاشىلىقتاردى بىرىكتىرەتىن 174 كووپەراتيۆتەر قۇرىلىپتى.

-2016-2017 جىلدار ارالىعىندا بارلىق اۋىلدىق وكرۋگتەردە كووپەراتيۆتەردى قۇرۋ جوسپارلانىپ وتىر،-دەيدى وقو اكىمدىگىنىڭ ماماندارى.

سول سەكىلدى قايتا وڭدەۋ سالاسىندا دا ايتارلىقتاي جاڭالىقتار ورىن الۋدا. قازىرگى تاڭدا بۇل باعىتتا جۇمىس ىستەپ جاتقان 198 كاسىپورىن بولسا، ولاردىڭ 27-ءسى ءىرى كاسىپورىندار ساناتىنا جاتادى. ال اۋىل شارۋاشىلىعى ونىمدەرىن قايتا وڭدەۋ كولەمى 128,7 ميلليارد تەڭگەنى قۇراپ، وتكەن جىلدان 15,2 ميلليارد تەڭگە ارتتى. وسىلايشا ناقتى يندەكس كولەمى 104,6 پايىزعا جەتىپتى.

ايتا كەتەيىك، بيىل وڭتۇستىك قازاقستان وبلىسىندا «اگروبيزنەس – 2020»، «سىباعا»، «التىن اسىق»، «قۇلان» باعدارلامالارى جوعارى دەڭگەيدە جۇمىس جاساعان.

سونىڭ ارقاسىندا وڭىردە مال ونىمدەرى وتكەن جىلمەن سالىستىرعاندا ەداۋىر ءوسىم كورسەتكەن. مىسالى، جەلتوقسان ايىنداعى قورىتىندى ستاتيستيكالىق دەرەكتەرگە سۇيەنسەك،  «سىباعا» باعدارلاماسى بويىنشا 25,4 مىڭ باس انالىق مال سيىر ساتىپ الىنعان. بۇل كورسەتكىش جالپى انالىق باسقا شاققانداعى ۇلەسى 20,2 پايىزدى قۇرايدى.

«التىن اسىق» باعدارلاماسىمەن 38,1 مىڭ باس قوي ساتىپ الىنعان. ال، «قۇلان» باعدارلاماسى اياسىندا 3,5 مىڭ باس جىلقى ساتىپ الىنىپتى.

وسىنىڭ بارلىعىن ەسەپتەي كەلگەندە وڭتۇستىك قازاقستان وبلىسىنداعى ءىرى قارا مالدىڭ سانى 4,3 پايىزعا، قوي مەن ەشكى 2,2 پايىزعا كوبەيگەن. اكىمدىكتىڭ اۋىلشارۋاشىلىق باسقارماسىنىڭ دەرەكتەرىنە ۇڭىلسەك، جىلقى سانى 8,8, پايىزعا، تۇيە دە 3 پايىزعا ارتقان.  

Abai.kz