پرەزيدەنت اكىمشىلىگى باسشىسىنىڭ بۇرىنعى ورىنباسارى باعلان مايلىباەۆ قاماۋعا الىندى، - دەپ حابارلايدى اباي-اقپارات قر ۇقك ءباسپاسوز قىزمەتىنە سىلتەمە جاساپ.

"2017 جىلعى 12 قاڭتاردا قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى قازاقستان رەسپۋبليكاسى قىلمىستىق كودەكسى 185-بابى 1, 3-بولىگىندە كوزدەلگەن ("مەملەكەتتiك قۇپيالاردى زاڭسىز جيناۋ، تاراتۋ، جاريا ەتۋ") قىلمىستاردى جاسادى دەگەن كۇدىكپەن قر پرەزيدەنتى اكىمشىلىگىنىڭ قىزمەتكەرلەرى بولعان ب. مايلىباەۆ جانە ن. گاليحين ۇستالدى. 14 قاڭتاردا استانا قالاسى، ەسىل اۋداندىق سوتى 2 اي مەرزىمگە قاماۋعا الۋ سانكتسياسىن بەردى. 

اتالعان تۇلعالار قازاقستان رەسپۋبليكاسى قىلمىستىق-پروتسەستىك كودەكسىنىڭ 128-بابىنا سايكەس ۇقك تەرگەۋ يزولياتورىنا قاماۋعا الىندى", - دەلىنگەن ۇقك حابارلاماسىندا.

كۇدىكتىلەردىڭ جانە ولاردىڭ تۋىستارىنىڭ تۇرعىلىقتى جەرلەرى بويىنشا تىنتۋلەر جۇرگىزىلدى، زاتتاي دالەلدەمەلەر الىندى. تەرگەپ-تەكسەرۋ جالعاسىپ جاتىر، ونىڭ بارىسى جانە ناتيجەلەرى جونىندە قوسىمشا حابارلاناتىن بولادى.

باعلان مايلىباەۆ 1975 جىلى دۇنيەگە كەلگەن. ول مەملەكەت باسشىسىنىڭ جارلىعىمەن قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى بولىپ 2011 جىلدىڭ قازان ايىندا تاعايىندالعان ەدى. "قۇرمەت", "پاراسات" وردەندەرىمەن، مەدالدارمەن، قازاقستان رەسپۋبليكاسى پرەزيدەنتىنىڭ العىس گراموتاسىمەن ماراپاتتالعان، قر ۇعا جاس عالىمدار سىيلىعىنىڭ لاۋرەاتى.

باعلان مايلىباەۆ 12 قاڭتاردا قىزمەتىنەن بوساعان بولاتىن. سول كۇنى مارات ءتاجين پرەزيدەنت اكىمشىلىگى باسشىسىنىڭ ءبىرىنشى ورىنباسارى بولىپ تاعايىندالعان ەدى.

اباي-اقپارات