تاۋەلسىزدىك جىلدارىندا قازاقستاندا مەملەكەتتىك بيۋدجەت قاراجاتى ەسەبىنەن 1 312 دەنساۋلىق ساقتاۋ نىسانى سالىنىپ، قولدانۋعا بەرىلدى، دەپ حابارلايدى قر دەنساۋلىق ساقتاۋ جانە الەۋمەتتىك دامۋ مينيسترلىگى.

ۆەدومستۆودا تۇسىندىرگەندەي، ونىڭ ىشىندە 8 مەديتسينالىق عىلىمي ورتالىق، 32 مامانداندىرىلعان مەديتسينالىق ورتالىق، 176 اۋرۋحانا، 144 ەمحانا، 907 امبۋلاتوريا جانە 45 مامانداندىرىلعان دەنساۋلىق ساقتاۋ نىسانى (قان ورتالىقتارى، پاتولوگواناتوميالىق بيۋرو جانە باسقالارى).

انا مەن بالا ۇلتتىق عىلىمي ورتالىعى، رەسپۋبليكالىق بالالاردى وڭالتۋ ورتالىعى، رەسپۋبليكالىق دياگنوستيكالىق ورتالىق،  ۇلتتىق نەيروحيرۋرگيا ورتالىعى، ۇلتتىق عىلىمي ونكولوگيا جانە ترانسپلانتولوگيا ورتالىعى، ۇلتتىق عىلىمي كارديوحيرۋرگيا ورتالىعى جانە ت.ب. سياقتى ءىرى مەديتسينالىق ۇيىمدار قۇرىلعان.

2007 جانە 2011 جىلدارداعى قازاقستان حالقىنا جولداۋىندا ايتىلعان مەملەكەت باسشىسىنىڭ تاپسىرمالارىن ورىنداۋ بارىسىندا، «100 مەكتەپ جانە 100 اۋرۋحانا سالۋ» جوباسى ىسكە اسىرىلدى جانە جالپى قۇنى 360 ملرد تەڭگە «350 دارىگەرلىك امبۋلاتوريا، فەلدشەرلىك-اكۋشەرلىك پۋنكت جانە ەمحانا سالۋ» جوباسىنىڭ ىسكە اسىرىلۋى اياقتالۋعا جاقىن قالدى.

اعىمداعى جىلعى 1 قاراشاداعى مالىمەت بويىنشا جوعارىدا كورسەتىلگەن جوبالار اياسىندا 441 دەنساۋلىق ساقتاۋ نىساندارى سالىندى، سونىڭ ىشىندە: اقمولا وبلىسىندا – 19, اقتوبە وبلىسىندا – 26, الماتى وبلىسىندا – 48, اتىراۋ وبلىسىندا – 31, شىعىس قازاقستان وبلىسىندا – 32, جامبىل وبلىسىندا – 32, باتىس قازاقستان وبلىسىندا – 21, قاراعاندى وبلىسىندا – 31, قوستاناي وبلىسىندا – 20, قىزىلوردا وبلىسىندا – 32, ماڭعىستاۋ وبلىسىندا – 31, پاۆلودار وبلىسىندا – 23, سولتۇستىك قازاقستان وبلىسىندا – 8, وڭتۇستىك قازاقستان وبلىسىندا – 66, الماتى قالاسىندا – 12, استانا قالاسىندا – 9.

«قازىرگى ۋاقىتتا 65 دەنساۋلىق ساقتاۋ نىسانىنىڭ قۇرىلىسى جالعاسۋدا، سونىڭ ىشىندە 2017 جىلى 39 جانە اعىمداعى جىلى 26 نىساندى اياقتاۋ جوسپارلانۋدا»، – دەلىنگەن حابارلامادا.

دەنساۋلىق ساقتاۋ ۇيىمدارى جەلىسىن ارى قاراي دامىتۋ ءۇشىن قر ءدسادم ساراپشىلارىمەن اعىمداعى جىلى قولدانىستاعى مەديتسينالىق ۇيىمداردىڭ جاعدايىنا كارتوگرافيالاۋ جانە تۇگەندەۋ جۇرگىزىلدى، بارلىعى – 8  مىڭنان استام نىسان.

قازاقستان-بريتان تەحنيكالىق ۋنيۆەرسيتەتى ماماندارىمەن بىرىگىپ «مەديتسينالىق كومەك كورسەتۋدى وڭىرلەر بولىنىسىندە جانە دەڭگەيىندە دەنساۋلىق ساقتاۋ ينفراقۇرىلىمىن ودان ءارى دامىتۋ جوسپارى»  اقپاراتتىق جۇيەسىن ازىرلەۋ جۇمىستارى باستالدى.

دەنساۋلىق ساقتاۋ جۇيەسىنىڭ ينفراقۇرىلىمىن ودان ءارى دامىتۋدا بيۋدجەتتىك شىعىنداردان بولەك ءمجا، سەنىمگەرلىك باسقارۋ جانە جەكەشەلەندىرۋ مەحانيزمدەرى ارقىلى جەكە سەكتورداعى رەسۋرستار تارتىلاتىن بولادى.

دەرەككوزى: naryk.kz

Abai.kz