10 جەلتوقساندا ۆەنادا مۇناي ءوندىرۋشى ەلدەر ۇيىمى (وپەك) جانە وعان كىرمەيتىن ەلدەر (ازەربايجان، باحرەين، بوليۆيا، ەكۆاتورلىق گۆينەيا، قازاقستان، مالايزيا، ومان، رەسەي، سۋدان جانە وڭتۇستىك سۋدان) مينيسترلەرىنىڭ جيىنى وتكەن. وندا مۇناي ءوندىرىسى كولەمىن ازايتۋ تۋرالى ورتاق كەلىسىم جاسالعان.

كەلىسىم بويىنشا، وپەك ەلدەرى مۇناي ءوندىرىسىن تاۋلىگىنە 1,2 ميلليون باررەلگە دەيىن ازايتىپ، تاۋلىكتىك نورمانى 32,5 ميلليون باررەلگە تۇسىرەدى. ۇيىمعا كىرمەيتىن ەلدەر ءوندىرىستى 558 مىڭ باررەلگە دەيىن ازايتادى. كەلىسىم كەلەسى جارتى جىلدىقتىڭ سوڭىنا دەيىن كۇشىندە بولماق.

قازاقستان كەلىسىم بويىنشا ءوندىرىس كولەمىن قاراشادا وندىرگەن مۇناي كولەمىنەن ازايتپاق. قازاقستان قاراشادا 1,7 ميلليون باررەل مۇناي وندىرگەن.

مينيسترلىك 20 مىڭ باررەل مۇناي اقتوبە، قىزىلوردا جانە ماڭعىستاۋ وبلىستارىنداعى كەنىشتەرىندە ءوندىرىستى قىسقارتۋ ەسەبىنەن ازايتىلاتىنىن، قاشاعان، تەڭىز جانە قاراشىعاناق كەنىشتەرىندە ءوندىرىس كولەمى ازايمايتىنىن ايتادى.

كەلىسىمگە ساي، رەسەي تاۋلىكتىك ءوندىرىس كولەمىن 300 مىڭ باررەل، مەكسيكا 100 مىڭ باررەل، ازەربايجان 30 مىڭ باررەل، مالايزيا 20 مىڭ باررەلگە ازايتۋعا مىندەتتەمە العان.

اباي-اقپارات