«سامۇرىق-قازىنا» ۇلتتىق ءال-اۋقات قورى يندۋستريالاندىرۋ باعدارلاماسىنىڭ ەكىنشى كەزەڭى اياسىندا 30 مىڭ جاڭا جۇمىس ورنىن اشۋعا جوسپارلاپ وتىر. بۇل تۋرالى جۋرناليستەرگە بەرگەن سۇحباتىندا قوردىڭ باسقارما توراعاسى ومىرزاق شوكەەۆ مالىمدەدى.

قور باسشىسىنىڭ ايتۋىنشا، «سامۇرىق-قازىنا» جاڭا بەسجىلدىق شەڭبەرىندە قارا جانە ءتۇستى مەتاللۋرگيا، مۇناي-گاز-حيميا جانە اگروحيميا ءتارىزدى باسىم سالالاردا يندۋستريالاندىرۋ باعدارلاماسىن ىسكە اسىرۋعا بەلسەندى قاتىسادى.

«قازىردىڭ وزىندە بىرقاتار نىسانداردا قۇرىلىس جۇمىستارى بەلسەندى جۇرگىزىلىپ جاتىر، ءارى 2000-عا جۋىق جۇمىس ورىنى دا اشىلدى. قۇرىلىس كەزىندە بارلىعى 25 مىڭنان استام جانە پايدالانۋ كەزىندە 4 مىڭنان استام جۇمىس ورنى قۇرىلاتىن بولادى»، - دەپ مالىمدەدى ومىرزاق شوكەەۆ.

سونىمەن قاتار، قور جوبالاردى قارجىلاندىرۋ تاسىلدەرىن وزگەرتكەندىگىن دە اتاپ ءوتتى. ەگەر ءبىرىنشى بەسجىلدىق جوسپارىن جۇزەگە اسىرۋ كەزەڭىندە مەملەكەتتىك قاراجات پايدالانىلعان بولسا، باعدارلامانىڭ جاڭا كەزەڭىندە سىرتقى ينۆەستيتسيا بەلسەندى تارتىلۋدا. ولاردىڭ قاتارىندا حالىقارالىق قارجىلىق ينستيتۋتتار مەن بانكتەر، سونداي-اق، ستراتەگيالىق ينۆەستورلار دا بار. ترانسۇلتتىق كورپوراتسيالارعا ەرەكشە كوڭىل اۋدارىلدى.

«ەلباسى ترانسۇلتتىق كورپوراتسيالاردى تارتۋ بويىنشا جۇمىستى بەلسەندىرەك جۇرگىزۋدى تاپسىردى، ءبىز ونى تولىقتاي قولدايمىز، ويتكەنى بۇل كومپانيالار تىكەلەي ينۆەستيتسيالار اكەلەدى، كومپانيالاردى باسقارۋدىڭ ۇزدىك تاجىريبەسىنە يە جانە قازىرگى زامانعا ساي تەحنولوگيالارى بار، ءارى شەتەلدىك نارىقتارعا شىعۋعا دا مۇمكىندىك بەرەدى»،- دەپ ايىرىقشا اتاپ ءوتتى ومىرزاق شوكەەۆ.

ءبىرىنشى بەسجىلدىق شەڭبەرىندە «سامۇرىق-قازىنا» قورىنىڭ جوبالارى اشىلعان جۇمىس ورىندارىنىڭ قۇنى مەن سانى بويىنشا، جالپى العاندا، شامامەن باعدارلامالاردىڭ 40% قۇرادى. 1200 كيلومەتردەن استام تەمىر جول سالىندى، جۇك ۆاگوندارى مەن ەلەكتروۆوزدار قۇراۋ بويىنشا وندىرىستىك قۋات ەنگىزىلدى، اففيناج زاۋىتى سالىندى جانە جول بيتۋمى ءوندىرىسى ۇيىمداستىرىلدى.

Abai.kz