ەل تاۋەلسىزدىگىنىڭ 25 جىلدىعى اياسىندا، "ەڭبەك كۇنى" مەرەكەسىنە وراي ورداباسىلىق ارداگەرلەر باس قوسىپ، كۇش سىناستى. ءار اۋىل وكرۋگىنەن ۇمىتكەرلەر قاتىسقان 60 ازامات سپورتتىڭ ارقان تارتۋ، كىر تاسىن كوتەرۋ، قول كۇرەس، دويبى تۇرلەرىنەن ءوزارا جارىستى. 

اۋىر تاستى كوتەرۋدەن شۇبارلىق 65 جاستاعى ءا.نىسانباەۆ ۇزدىك دەپ تانىلسا، قول كۇرەستىرۋدەن قاجىمۇقاندىق ي.ورازباەۆ وزىنە قارسىلاس شاق كەلتىرمەدى. دويبى ويناپ، شۇبارلىق ارداگەر م.كەرىمبەكوۆ جەڭىمپاز اتاندى. ارقان تارتىسقاندا ارداگەرلەردىڭ كۇشى انىق بايقالدى. 

سايىستىڭ قورىتىسىندا جالپىكوماندالىق ەسەپ بويىنشا ءى ورىن - شۇبار، ءىى ورىن - قاجىمۇقان، ءىىى ورىن جەڭىس اۋىل وكرۋگى ارداگەرلەرىنە بۇيىردى.

جەڭىمپازدار ارنايى العىس حاتپەن، كۋبوكپەن ماراپاتتالدى. ورداباسى اۋداندىق دەنە شىنىقتىرۋ جانە سپورت ءبولىمى اۋداندىق ارداگەرلەر ۇيىمىنا العىسىن ءبىلدىرىپ، سىيلىق تابىستادى. سونىمەن قاتار، اپتانىڭ ءار جۇماسىندا ارداگەرلەر ۇيىندە شاحماتتان جارىس وتەتىنى كەلىسىلدى.

سالاماتتى ءومىر سالتىنىڭ "ەڭبەك كۇنىنەن" ارنالعان ءبىر كۇنىن ورداباسىلىق ارداگەرلەر وسىلايشا وتكەردى. مەملەكەت باسشىسى «ۇلت جوسپارى» باعدارلاماسىندا بۇقارالىق سپورت تۇرىنە ءمان بەرۋ كەرەكتىگىن العا قويعان بولاتىن. ال، بۇقارالىق سپورت تۇرلەرى وسىنداي جارىستار بارىسىندا كوپشىلىك سيپات الا تۇسەرى انىق.

ورداباسى اۋدانى اكىمىنىڭ ءباسپاسوز قىزمەتى

Abai.kz