تۇركىستاندا شۇبات پەن قىمىزدىڭ ۇنتاقتى قوسپاسى ءوندىرىسىن، سونداي-اق تامشىلاتىپ سۋارۋ ءۇشىن جابدىق دايىنداۋ بويىنشا وقو-دا زاۋىت سالۋ جوباسىن ىسكە اسىرۋ بارىسىن قىتايداعى قازاقستان ەلشىسى شاحرات نۇرىشەۆ پەن «Golden Camel» جشس باس ديرەكتورى يان تسزە تالقىلادى. بۇل تۋرالى بەيجىڭدە «قازاقپارات» حاا مەنشىكتى ءتىلشىسى حابارلادى.

قىتاي بيزنەسمەنى تۇركىستان قالاسىندا تاياۋ ۋاقىتتا كۇندەلىكتى ونىمدىلىگى 100 تونناعا دەيىن قىمىز بەن شۇبات قايتا وڭدەيتىن زاۋىت سالۋ باستالاتىنىن اتاپ ءوتتى. اتالمىش زاۋىتتىڭ ءونىمىن قحر-عا، ەۋروپا وداعى جانە تاياۋ شىعىس ەلدەرىنە  ەكسپورتتاۋ جوسپارلانۋدا.

بۇدان باسقا، يان تسزە وقو اۋماعىندا قازىرگى ۋاقىتتا تامشىلاتىپ سۋارۋ ءۇشىن جابدىق ءوندىرۋ بويىنشا زاۋىت سالۋعا تەحنيكالىق-ەكونوميكالىق نەگىزدەمە ازىرلەنگەنىن حابارلادى.  

ش. نۇرىشەۆ كاسىپورىن باسشىسىن ەلىمىزدەگى ينۆەستيتسيالىق كليماتپەن، قازاقستاندا ىسكە اسىرىلىپ جاتقان «نۇرلى جول» باعدارلاماسى جانە قر مەن قحر اراسىنداعى يندۋستريالاندىرۋ جانە ينۆەستيتسيا باعدارلامالارىنىڭ نەگىزگى ەرەجەلەرىمەن تانىستىردى.

«Golden Camel» كومپانياسى - قحر-دىڭ سولتۇستىك-شىعىسىنداعى حەيلۋنتسزيان پروۆينتسياسىنىڭ سۋ ۇنەمدەيتىن سۋلاندىرۋ جۇيەسىن ءوندىرۋ جانە اگروونەركاسىپتىك كەشەندى يندۋستريالاندىرۋ بويىنشا كوشباسشىسى - «China Daqing Gold Land of Water-saving Engineering Co.Ltd» كومپانياسىنىڭ  ەنشىلەس كومپانياسى بولىپ تابىلادى.

Abai.kz