قازىعۇرت اۋدانىندا ەل تاۋەلسىزدىگىنىڭ 25 جىلدىعى اياسىندا «اسپازشىلار بايقاۋى» ءوتتى.

بۇل بايقاۋدىڭ ماقساتى - كەڭ كولەمدە ءتۇرلى ۇلت وكىلدەرىنىڭ اراسىندا ءوزارا دوستىق پەن ىنتىماقتاستىقتى نىعايتۋ جانە ءتۇرلى ۇلت پەن ۇلىس اسپازدارىنىڭ شەبەرلىگىن ارتتىرۋ بولىپ تابىلادى.

بايقاۋعا اۋداننىڭ 13 اۋىل وكرۋگىنەن 16 اسپازشى قاتىسىپ، ءتۇرلى اس دايىندالدى. نەگىزىنەن اسپازشىلار قازاق، تاتار، وزبەك، يران، ورىس جانە ۇيعىر تاعامدارىن دايىنداپ، قازىلار القاسىنا ۇسىندى. 

ۇلتتىق تاعامداردان قازىعۇرت اۋىلى وكرۋگىنىڭ اسپازشىلارى تاتار، ورىس تاعامدارىنىڭ شەبەرى اتانسا، تۇربات اۋىل وكرۋگىنىڭ اسپازشىلارى وزبەك، ۇيعىر تاعامدارى بويىنشا قارسىلاس شاق كەلتىرمەدى. ال ق.ابداليەۆ اۋىلى وكرۋگىنىڭ اسپازشىلارى قازاق، يران تاعامدارىن دايىنداۋدان وق بويى وزا شاپتى.

بايقاۋ بارىسىندا اۋداندىق مادەنيەت سارايىنىڭ ونەرپازدارى كونتسەرت كورسەتىپ، بايقاۋعا ءوز ۇلەستەرىن قوستى. جۇلدەلى ورىندارعا يە بولعان اسپازشىلارعا اۋدان اكىمدىگى تاراپىنان سىي-سياپات جاسالىپ، 300-گە جۋىق كورەرمەننىڭ كوزايىمىنا اينالدى.

العاشقى كەزەڭدە ءتۇرلى كوكونىستەر سالىنعان ءۇش بىردەي قارا جاشىك ءار كومانداعا تاپسىرىلدى. ولار بار-جوعى جيىرما مينۋت ىشىندە ودان ءدامدى ەتىپ تاعام دايىنداۋى ءتيىس بولاتىن. بۇل سىننان بارلىعى دا سۇرىنبەي ءوتتى. ال كەلەسى كەزەڭدە بايقاۋعا قاتىسۋشىلار ۇيدەن جاساپ اكەلگەن تاعامدارىن داستارحانعا تارتتى. ونىڭ قالاي جاسالعانىن ءتۇسىندىرىپ، پايداسىنا توقتالدى. وقۋشىلاردىڭ قولىنان شىققان تاعامداردان ءدام تاتقان قوناقتار ۇزدىگىن انىقتادى. سوڭىنان جەڭىمپازدار باعالى سىيلىقتارمەن ماراپاتتالدى.

قازىعۇرت اۋدانى اكىمىنىڭ ءباسپاسوز قىزمەتى