اباي اتامىز بالاسى ءابدىراxماندى سىناۋ ءۇشىن "اق ءتۇس جاقسى ما، جوق الدە قارا ءتۇس جاقسى ما؟" دەپ سۇراپتى دەسەدى. ءابدىراxمان "اق ءتۇس" جاقسى دەگەندە، اباي اتامىز وعان قارسى شىعىپ: "قارا ءتۇس جاقسى. ادام بالاسى قايراتتى، كۇشتى، قۋاتتى كەزىندە شاشى قارا بولادى. جاس بالانىڭ شاشى اعارىپ كەتسە، وندا اسەمدىكتەن، ادەمىلىكتەن بەلگى دە قالمايدى. اق قاعازعا دا xات قارا سيامەن تۇسەدى. ادام بالاسى ءوزى ارداق تۇتقان قادىرلى زاتىن كوزىنىڭ قاراشىعىنداي ساقتايدى. سوندىقتان قارا ءتۇس جاقسى" دەگەن ىڭعايدا اڭگىمە ايتادى.

سوندا ءابدىراxمان: ء"سىز ونى قالاي ءبىلدىڭىز؟" دەپ سۇرايدى. اباي اتامىز: "مەن ونى اقىلىممەن، ميىممەن، ساناممەن ءبىلدىم" دەيدى. ءابدىراxمان: ء"سىز سول اقىل-وي مەن ساناڭىزدىڭ ءتۇسىن قانداي دەپ ويلايسىز" دەگەندە، اباي اتامىز: "اق قوي، اق" دەپ كۇلگەن ەكەن.

اق پەن قارا. ماڭگىلىك تەكەتىرەس. اڭىز اڭگىمە، ەرتەگىلەردە قارا ىلعي باسىمدىققا يە بولىپ كەلەدى دە، سوڭعى ساتتە اق ايتەۋىر جەڭىس تۇعىرىنا كوتەرىلەدى. ءمان بەرسەك، ادام بالاسى دا وسىنداي تەكەتىرەستى، قايشىلىقتى ءومىر كەشەدى. سول ارپالىسپەن ءومىر دە سوڭعى مەجەگە تايايدى. ءومىر اتتى مايداننان تاياعىنا سۇيەنگەن قاريا ءىلبي باسىپ شىعىپ كەلە جاتادى. بويىندا ءال دە، كۇش تە، قۋات تا قالماعان. بىراق... ءيا. ساقال-شاشى اپپاق. دەمەك ول ءومىر مايدانىندا جەڭىسكە جەتتى. قارادان اقتىڭ ۇستەم تۇراتىنىن دالەلدەدى. سوندىقتان ول اعارعان شاش پەن ساقال اللا الدىندا دا قادىرلى. سوعان وراي دىنىمىزدە قارتتاردى قۇرمەتتەۋگە بارىنشا ءمان بەرىلەدى. پايعامبارىمىز (س.ع.س.) "جاس ادام ءبىر قارتتىڭ جاسىنا قاراپ قۇرمەت كورسەتسە، ونىڭ جاسىنا بارعاندا اللا تاعالا وعان دا جاستاردى قۇرمەت ەتتىرەدى" دەگەن. سونداي-اق xاديس-شاريفتەردە: "ۇلكەندەرىن قۇرمەتتەمەگەن، كىشىلەرگە مەيرىم ەتپەگەن ادام بىزدەن ەمەس". "قارتتارعا قۇرمەت جانە سياپات، اللا تاعالاعا دەگەن قۇرمەتتەن". "مۇسىلمان - السىزدەرگە، اۋرۋلارعا، كارىلەرگە جانە كىشىلەرگە مەيرىم ەتەدى" دەلىنەدى.
الايدا، قارتتىققا جاسالار قۇرمەتتە ونىڭ دارەجەسى مەن بايلىعى قاپەرگە الىنباۋى ءتيىس. ونداي الالاۋ سوڭى اللا تاراپىنان لاعىنەتتەلۋگە ۇلاسىپ كەتۋى مۇمكىن. سوندىقتان دىنىمىزدە جاسى كەلگەن ادامعا ونىڭ كىم بولعانىنا قاراماستان قۇرمەت كورسەتىلەدى. 

بىردە ءجالالاددين رۋمي xازرەتى وزىنەن سۇxبات تىڭداۋعا كەلگەن ءبىر جاس جىگىتتىڭ قارت كىسىدەن جوعارى شىعىپ وتىرعانىن كورەدى. ايتسە دە وعان ەشنارسە دەمەي، مىنا ءبىر وقيعانى بايان ەتەدى: "بىردە xازرەتى ءالي نامازعا اسىعىپ كەلە جاتسا، الدىندا ءبىر xريستيان قاريا ءىلبىپ باسىپ كەتىپ بارا جاتىر ەكەن. حازرەتى ءالي ونىڭ جاسىن سىيلاپ، وزىپ كەتپەستەن سوڭىنان ىلەسەدى. سول سەبەپتى نامازعا كەشىگەدى. الايدا، جابىرەيىل پەرىشتە پايعامبارىمىزعا ءبىرىنشى باستاعى رۋxىعا تۇرعان كەزدى سوزدىرتىپ، xازرەتى ءاليدى نامازعا ۇلگەرتەدى" دەپ، جاسى ۇلكەندەرگە ولاردىڭ ۇستانعان دىنىنە قاراماستان قۇرمەت كورسەتۋ قاجەتتىلىگىن تۇسىندىرگەندە، الگى جىگىت ءوزىنىڭ اعاتتىققا بوي الدىرعانىن ءبىلىپ، قاريانىڭ تومەن جاعىنا بارىپ وتىرادى.

ءيا، ءبىز دە قارتتارىمىزدى قازىنا كورىپ، قۇرمەتتەيمىز. ءبىزدىڭ اق شاشتى كۇمىسكە بالايتىنىمىز بار. شىنتۋايتىنا كەلگەندە ول - نۇر عوي. اللانىڭ نۇرى. قارتتاردىڭ قازىنا بولاتىندىعى سوندىقتان. اللا نۇردىڭ ماتەريالدىق كورىنىسىنىڭ ءوزىن قۇرمەت بيىگىنە كوتەرەدى. ال ىشكى الەمى، جۇرەگى نۇرلانعاندار جاسىنا جەتپەي-اق الگى قارتتار قاتارىندا توردەن ورىن الادى. تەك قارتتىق قادىرىن تۇسىنبەي، شاشىمىزدى ءومىرىن بوسقا وتكىزگەن كەي شالدار سەكىلدى كۇنگە اعارتىپ الماساق بولدى...

قۇديار ءبىلال

Facebook-تەگى پاراقشاسىنان