2016 جىلعى 26 قازاندا قازاقستان رەسپۋبليكاسىنىڭ ۇلتتىق مۋزەيى تاۋەلسىزدىكتىڭ 25 جىلدىعىنا وراي الەۋمەتتىك جوبا اياسىندا جانە وتكەن مۇگەدەكتەر كۇنىنە بايلانىستى (قازان ايىنىڭ ەكىنشى جەكسەنبىسى) مۇمكىندىگى شەكتەۋلى جاندارعا ارناپ اقىسىز ەكسكۋرسيا وتكىزدى.   

وسى كۇنگە ورايلاستىرا وتىرىپ «نۇر وتان» پارتياسىنىڭ استانا قالاسى بويىنشا فيليالى مەن «تسەسنابانك» اق قازاقستان رەسپۋبليكاسىنىڭ ۇلتتىق مۋزەيىنە مۇگەدەكتەرگە ارنالعان اربالار تابىستادى.

شارا بارىسىندا قوناقتارعا مۋزەي زالدارى بويىنشا ارنايى ەكسكۋرسيا جۇرگىزىلدى. كەلگەن قوناقتار ۇلتتىق مۋزەيدەگى بارلىق زالداردى تاماشالاپ، مۋزەي ەكسپوناتتارىمەن تانىستى. ەكسكۋرسيا سوڭىندا ۇيىمداستىرۋشىلارعا العىس ايتا وتىرىپ مۋزەيدەن العان اسەرلەرىمەن ءبولىستى.

نۇرمانوۆا توعجان ابدىراحمانقىزى، استانا قالاسىنىڭ تۇرعىنى:

- وتە كەرەمەت. مۋزەي ماعان قاتتى ۇنادى. بۇل مۋزەيگە ءبىرىنشى رەت كەلىپ تۇرمىن. وسى مۋزەيگە كەلۋگە مۇمكىندىك العانىما وتە قۋانىشتىمىن. ماعان اسىرەسە ەجەلگى جانە ورتا عاسىرلار تاريحى زالى قاتتى ۇنادى. وسىنداي الەۋمەتتىك جوبالاردى ۇيىمداستىرعانى ءۇشىن ۇلتتىق مۋزەيگە العىس بىلدىرەمىن.

ەدىگەەۆ ساكەن تىشقانبايۇلى، استانا قالاسىنىڭ تۇرعىنى:

- بۇگىن مىناۋ ۇلتتىق مۋزەيگە كەلىپ جاتقانىمىزعا قۋانىشتىمىز. جاقسى اسەر الدىق. بارلىق زالدار ۇنادى. قازاق ەلىنىڭ وتكەنىمەن تانىسىپ، تاريحي بۇيىمداردى كوردىك. بالام اسىلجان الەۋمەتتىك كومەككە مۇقتاج. سول ۇلىمدى الىپ كەلىپ ەكەۋمىز مۋزەيدى تەگىن تاماشالاپ شىقتىق. ءبىز ءۇشىن بۇنداي جەرلەرگە اقشا شىعارىپ كەلۋ قيىنداۋ. سوندىقتان دا وسى شارانى ۇيىمداستىرۋشىلارعا العىس ايتقىم كەلەدى.

اتالعان اكتسيانىڭ ماقساتى – مۇمكىندىگى شەكتەۋلى جاندارعا  دا ەلىمىزدىڭ تاريحى مەن مادەنيەتىن كورىپ تاماشالاۋعا  جاعداي جاساۋ. ۇلتتىق مۋزەي وسىعان دەيىن ۇستازدار مەرەكەسى قارساڭىندا استانالىق ۇستازداردى جانە ارداگەرلەردى ارنايى اقىسىز ەكسكۋرسياعا شاقىرعان بولاتىن.