بۇل تۋرالى سايرام اۋدانىنىڭ اكىمى سامات ساپارباەۆ وقو ايماقتىق كوممۋنيكاتسيالار قىزمەتىندە وتكەن بريفينگتە حابارلادى. ايتۋىنشا، اۋداندا ەگەمەندىك العان جىلدارى جالپى وڭىرلىك ءونىم 3,8 ملرد. تەڭگەدەن 90,3 ملرد. تەڭگەگە ءوسىپ، جان باسىنا شاققاندا 449,3 مىڭ تەڭگەگە جەتكەن. ءوڭىردىڭ ەكونوميكالىق دامۋىن انىقتايتىن باستى سالا – ونەركاسىپ سالاسى دەسەك، 1991 جىلى اۋداننىڭ ونەركاسىپ كاسىپورىندارى 224,8 ملن. تەڭگەنىڭ ءونىمىن وندىرسە، 2015 جىلى بۇل كولەم 18194,0 ملن. تەڭگەگە جەتىپ، كورسەتكىش 8,1 ەسەگە ارتقانىن كورسەتىپ وتىر.

«ەگەمەندىك جىلدارىندا اۋداندا ءىرى قارا مال سانى 1991 جىلى 61 مىڭنان اسسا، 2016 جىلى 151 مىڭنان استام باسقا جەتىپ، 2,4 ەسەگە ءوستى. قوي-ەشكى سانى 65 مىڭ باستان 99 مىڭ باسقا جەتىپ، 150 %-دى قۇرادى. جىلقى 6500 باستان 37 مىڭ باسقا جەتىپ، 574 %-دى قۇرادى. ەت ءونىمى 1991 جىلعى 6880 توننادان 21000 تونناعا جەتىپ، 3 ەسەگە ءوستى. ءسۇت ءونىمى 1991 جىلى – 40684 توننا بولسا، 2016 جىلى -160 مىڭ تونناعا جەتىپ، 2,8 ەسەگە ءوستى. جۇمىرتقا 1991 جىلى – 98500 بولسا، 2016 جىلى – 142 مىڭ داناعا جەتىپ، 1,4 ەسەگە ءوستى. ءجۇن 197 توننادان 224 تونناعا، نەمەسە 137 %-عا ءوستى»، - دەدى س.ساپارباەۆ.

ءباسپاسوز جيىنىندا وزگە دە سالالارداعى جەتىستىكتەرگە توقتالعان اۋدان باسشىسى تۋريزم سالاسى بويىنشا سايرامدا ەگەمەندىك العانعا دەيىن جۇمىس ىستەلمەگەنىن العا تارتىپ، وسىناۋ تاۋەلسىزدىك جىلدارىندا سالاعا ەرەكشە كوڭىل ءبولۋ ارقاسىندا اۋداننىڭ تابىستى بيزنەس ءتۇرىنىڭ بىرىنە اينالعانىن جەتكىزدى. اتاپ ايتقاندا، بۇگىنگى تاڭدا سايرامداعى ابىلاي حان ات باسىن تىرەگەن حانقورعان توبەسى، سيقىم بابا، جانىس بابا كەسەنەلەرى دە حالىق يگىلىگى ءۇشىن جۇمىس جاساۋدا ەكەن. سايرام اۋدانى قالاعا جاقىن ورنالاسقاندىقتان اقسۋ، ماشات، ارىس وزەندەرى مەن كولكەنت جانە قىرىقكول دەپ اتالاتىن كولدەر بويىندا دەمالىس نىساندارى كوپتەپ بوي كوتەرىپ، كەلۋشىلەردىڭ سانى دا جىل ساناپ ارتىپ كەلە جاتقانى باياندالدى.    

تىلشىلەرمەن بولعان كەزدەسۋدە سامات ايدارحانۇلى كۇندەلىكتى حالىققا قاجەتتى تاماق ونىمدەرىنىڭ 20 ءتۇرىنىڭ 18-ءى، ياعني، قانت پەن تازارتىلعان كۇرىشتەن باسقا ونىمدەردىڭ بارلىعى سايرامدا وندىرىلەتىنىن ماقتان ەتتى. بارلىق سالالار بويىنشا دامۋ كورسەتكىشتەرى جاقسارىپ كەلە جاتقان اۋداندا تاماق ونىمدەرىنىڭ 11 ءتۇرى اۋداندا ارتىعىمەن وندىرىلەتىنىن العا تارتتى.

سونداي-اق، ءوز سوزىندە كوممۋنالدىق، الەۋمەتتىك، ساۋلەت، قۇرىلىس، ءبىلىم، مادەنيەت، سپورت سالالارى سىندى وزگە دە باعىتتاعى جەتىستىكتەردى جەتكىزگەن اۋدان اكىمى بۇل باعىتتاعى جۇمىستاردىڭ ودان ءارى جالعاساتىنىن جەتكىزدى.

Abai.kz