شىمكەنت مەكتەپتەرىنە قىسقا ارنالعان قاتتى جانە سۇيىق وتىن تاسىمالداۋ جۇمىستارى باستالدى. قالاداعى كومىرمەن جىلىتىلاتىن مەكتەپتەر ءۇشىن 4400 توننا كومىر قاجەت. قازىر سونىڭ 400 تونناسى جەتكىزىلگەن. سونداي-اق، 400 توننا سۇيىق وتىن دا دايىندالعان. ەڭ باستىسى، قاتتى وتىن العان مەكتەپ باسشىلارى كومىردىڭ ساپاسى جاقسى دەپ وتىر. بۇل تۋرالى otyrar.kz جازادى.

وسىدان ەكى جىل بۇرىن سايرام اۋدانىنان شىمكەنت قالاسىنىڭ اۋماعىنا وتكەن №115 مەكتەپ 1990 جىلى تۇرعىزىلعان. ىڭعايلاستىرىلعان ءبىلىم وشاعىنىڭ باسشىلىعى قىسقا قاجەتتى 120 توننا قاتتى وتىندى قامداپ قويىپتى. 600 وقۋشىنى قىسقى سۋىقتا توڭدىرماۋدىڭ بارلىق شاراسىن قاراستىرىپ قويعانىن ايتادى. وتىننىڭ ساپاسىن بىردەن تەكسەرىپ العان.

گاۋھار الىقۇلوۆا، ديرەكتوردىڭ ورىنباسارى: ء«بىز وتىندى الماس بۇرىن ءوزىمىز كوميسسيا قۇرىپ، قويماداعى وتىندى ارنايى بارىپ كوردىك.»

ال №103 ورتا مەكتەپتىڭ ۇجىمى بيىل جىلداعىداي كومىر جاعىپ شارشامايدى. قالالىق ءبىلىم ءبولىمى شاھارداعى وسى سەكىلدى 5 مەكتەپتىڭ جىلىتۋ جۇيەسىن كومىردەن تابيعي گازعا اۋىستىرىپ جاتىر.

سونىمەن، بۇگىندە شىمكەنتتەگى 127 ءبىلىم وشاعىنىڭ 15-ءى عانا قاتتى وتىن پايدالانادى. بولاشاقتا ول مەكتەپتەرگە دە گازبەن جىلىتۋ قوندىرعىلارى ورناتىلماق. ويتكەنى ول ءتيىمدى، ءارى ىڭعايلى، دەيدى سالا ماماندارى.

Abai.kz