سوزاق اۋدانىندا اسىل تۇقىمدى مال ءوسىرۋ، بورداقىلاۋ جانە مال ونىمدەرىن وڭدەيتىن كەشەن - «سوز-اگرو» كورپوراتيۆتىك قورى قۇرىلدى. بۇل تۋرالى سوزاق اۋدانى اكىمىنىڭ ءباسپاسوز قىزمەتى حابارلايدى.

اتالعان كورپوراتيۆ قورىن قۇرۋ اۋدان اكىمدىگى جانە ۋران وندىرەتىن فرانتسۋزدىق «ارەۆا» كومپانياسى مەن قازاق-فرانتسۋز «كاتكو» بك-مەن ۇزاق جىلعى كەلسسوزدەردىڭ ناتيجەسىندە قول جەتكىزىپ وتىر.

قۇرىلتايشىسى «ارەۆا نس-كاتكو-دەمەۋ» بولىپ تابىلاتىن كورپوراتيۆتىك قور بيزنەستىڭ الەۋمەتتىك جاۋاپكەرشىلىك اياسىندا اۋدانداعى اۋىل شارۋاشىلىق سالاسىنا 400 ملن. تەڭگە ينۆەستيتسيا قۇيىپ وتىر.

اۋداندىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى ابۋباكىر ساحيۇلىنىڭ ايتۋىنشا، اتالعان  كورپوراتيۆكە 300 باس اسىل تۇقىمدى ءمۇيىزدى ءىرى قارا مەن 15 باس اسىل تۇقىمدى بۇقا الىنباق. بۇگىندە كەشەننەن مال ورىسىنە جەر بولىنگەن.

ىسكە اساتىن جوبادا مال باسىن الۋعا 50 ملن. تەڭگە، كەشەن قۇرىلىسىنا 268 ملن. ال اۋىل شارۋاشىلىعىنا قاجەتتى تەحنيكالارعا 82 ملن. تەڭگە قارجى جۇمسالىپ، جالپى 50 ادام جۇمىسپەن قامتىلاتىن بولادى.

سونداي-اق، «سوز- اگرا» كورپوراتيۆتىك قورى الداعى ۋاقىتتا قازاق ۇلتتىق اگرارلىق ۋنيۆەرسيتەتىنىڭ عالىمدارىمەن بىرلەسە وتىرىپ، اۋدان كولەمىندە اۋىل شارۋاشىلىعىن دامىتۋدى كوزدەپ وتىر. 

Abai.kz