تاۋەلسىزدىكتىڭ 25 جىلدىعىنا — 25 مەكتەپ. وبلىستا ەگەمەندىك تويى قارساڭىندا سۋ جاڭا ءبىلىم نىساندارى ەسىگىن ايقارا اشادى. پايدالانۋعا بەرىلەتىن ءبىلىم ۇيالارى نەگىزىنەن بالا سانى كوپ اۋدانداردا سالىنىپ جاتىر.

25 عيماراتتىڭ ىشىندەگى ەڭ ۇلكەنى — ىنتىماق شاعىناۋدانىنداعى 900 بالاعا لايىقتالعان ءبىلىم ۇياسى 1 قىركۇيەكتە بالالارعا ەسىگىن ايقارا اشادى. وسىعان دەيىن ەسكى ءارى تار مەكتەپتە ءبىلىم الىپ كەلگەن شاكىرتتەر بيىلعى وقۋ جىلىنان باستاپ زاماناۋي ۇلگىدەگى مەكتەپتە ءبىلىم الادى. قازىر جۇمىس 90 پايىزعا بىتۋگە جاقىن. جۇمىسشىلار ۇساق-تۇيەك شارۋالاردى اتقارىپ، اۋلا مەن عيمارات ءىشىن تازالاپ جاتىر.

وڭىردە بوي كوتەرگەن 9 ءبىلىم نىسانى «نۇرلى جول» باعدارلاماسى اياسىندا سالىنعان. جالپى بۇگىندە وبلىس اۋماعىندا 201 نىساننىڭ قۇرىلىسى جۇرگىزىلىپ جاتىر. ونىڭ الپىس جەتىسى — مەكتەپ، ال تورتەۋى — بالاباقشا.

ءبىلىم ۇيالارى نەگىزىنەن بالا سانى كوپ سايرام، سارىاعاش، قازىعۇرت پەن ماقتاارال، تۇركىستان جانە تۇلكىباس اۋداندارىندا سالىنۋدا. تاۋەلسىزدىكتىڭ 25 جىلدىعىنا تارتۋ بولاتىن 25 عيماراتتىڭ دا پايدالانۋعا بەرىلەتىن كۇنى جاقىن. وسىلايشا بيىل 6,5 مىڭنان استام شاكىرت سۋ جاڭا نىسانداردا ساۋات اشاتىن بولادى.

Abai.kz