سەيسەنبى، 2 تامىز كۇنى وڭتۇستىك قازاقستان وبلىسىنىڭ اكىمى بەيبىت اتامقۇلوۆ ماقتارال اۋدانىنداعى ەراليەۆ اۋىلدىق وكرۋگىنە قاراستى سەيفۋللين ەلدى مەكەنىندە قۇرىلعان شۇعىل شتابتىڭ جيىنىن وتكىزدى. بۇل تۋرالى  وقو اكىمىنىڭ ءباسپاسوز قىزمەتى حابارلايدى.

وتىرىسقا قر ىشكى ىستەر ءمينيسترىنىڭ ءبىرىنشى ورىنباسارى م.دەمەۋوۆ پەن قۇقىق قورعاۋ ورگاندارىنىڭ وكىلدەرى جانە وبلىستىق، سونداي-اق، اۋداندىق اكىمدىكتەردىڭ قىزمەتكەرلەرى قاتىستى.  

شتاب جيىنى بارىسىندا وبلىس اكىمى قابىلدانعان شارالار جايىمەن تانىسىپ، اتالعان ەلدى مەكەندە ءتارتىپ پەن زاڭدىلىقتى قامتاماسىز ەتۋ ءۇشىن ناقتى تاپسىرمالار بەردى.

مۇنان سوڭ بەيبىت اتامقۇلوۆ جەرگىلىكتى حالىقپەن، ونىڭ ىشىندە، اۋىلدىڭ اقساقالدارىمەن جانە اۋداندىق ءماسليحات دەپۋتاتتارىمەن كەزدەستى. وندا ءوڭىر باسشىسى كامەلەت جاسقا تولماعان ءجاسوسپىرىمنىڭ زورلىق-زومبىلىق ارەكەتىنىڭ راستالماعانىن ايتىپ، مەديتسينالىق ساراپتامانىڭ قورىتىندىسىن جاريالادى. ايماق باسشىسى اتالعان جاعدايدىڭ قىلمىستىق سيپاتتا ەكەنىن اتاپ ءوتىپ، اۋىل تۇرعىندارىن جالعان اقپاراتتار مەن قاۋەسەتتەرگە سەنبەۋگە شاقىردى.   

جيىن كەزىندە وبلىستىڭ باس پروكۋرورى ي.يمانوۆ ءسوز الىپ، ەلدى مەكەندە زاڭ بۇزۋشىلىقتى بولدىرماۋدىڭ قاجەتتى شارالارى قابىلدانعانىن جەتكىزدى.

اتالعان ەلدى مەكەندەگى قوعامدىق قاۋىپسىزدىك پەن تۇراقتىلىقتىقتى قامتاماسىز ەتۋ شارالارى جالعاساتىن بولادى.

جاعداي قاتاڭ باقىلاۋدا.

Abai.kz