وتىرار اۋدانىندا توپىراقتىڭ قۇنارلىلىعىن ارتتىرۋ، ونىمدىلىكتى ەسەلەۋ جانە تۇزدانعان توپىراقتى مۇمكىندىگىنشە ساۋىقتىرۋ ارقىلى قايتا اينالىمعا قوسۋ جۇمىستارى مىقتاپ قولعا الىنۋدا. بۇل تۋرالى وتىرار اۋدانى اكىمىنىڭ ءباسپاسوز قىزمەتى حابارلايدى.

تاياۋدا اتالعان ەگىس القابىندا اۋدانداعى ەگىن سالاسىنداعى وزەكتى ماسەلەلەردى شەشۋ، جەر قۇنارىن ارتتىرۋ، توپىراقتىڭ تۇزدىلىعىن تومەندەتۋ ماقساتىندا وبلىستىق دالالىق سەمينار ءوتتى. سەمينارعا اۋدان اكىمى ە.ايتاحانوۆ، اۋدانىمىزدىڭ اۋىل شارۋاشىلىعى سالاسىنىڭ وكىلدەرىنەن وزگە وبلىستىق اۋىل شارۋاشىلىعى باسقارماسىنىڭ باسشىسى س.تۇربەكوۆ، ءو.وسپانوۆ اتىنداعى قازاق توپىراقتانۋ جانە اگروحيميا عىلىمي زەرتتەۋ ينستيتۋتىنىڭ ديرەكتورى ا.ساپاروۆ جانە ينستيتۋت عالىمدارى ا.وتاروۆ، گ.اتاشەۆا، م.پوشانوۆتار قاتىستى.

سونداي-اق، سەمينارعا ارنايى جاپونيادان كيوتو ۋنيۆەرسيتەتىنىڭ پروفەسسورى فۋناكاۆا شينيا، اتالعان ۋنيۆەرسيتەتتىڭ ءبىر توپ ماگيسترانتتارى كەلىپ، كەلەلى پىكىرلەرى مەن عىلىمي تۇجىرىمدامالارىن ورتاعا سالدى.

باسقوسۋدا اۋدان اكىمى ە.ايتاحانوۆ بۇگىنگى ەگىن ەگۋ تەحنولوگياسىن عىلىمنىڭ جەتىستىكتەرىمەن ۇشتاستىرۋ كەرەك ەكەندىگىن باسا ايتتى. سونىمەن بىرگە، اۋدانداعى 368 شاقىرىمدى قۇرايتىن درەندەر جۇيەسى مەن 55 شاقىرىمدىق ء«شاۋىلدىر» باس كوللەكتورى تولىق جوندەۋدەن وتكەندە ەگىس القابى كوبەيىپ، وتىرار جۇگەرىسى بۇرىنعى داڭقىنا قايتا يە بولاتىنىنا سەنىم ءبىلدىردى.

سەمينار سوڭىندا شارۋالار مەن سەمينار قوناقتارى اتتىلى كىسى كورىنبەيتىن جۇگەرى القاپتارىن ارالاپ، سوبىقتارىن سارالاپ كوردى. كورگەن ادامنىڭ كوزى توياتىن جۇگەرى القابىنىڭ وسىلاي جايقالۋى عىلىمنىڭ جەتىستىگى ەكەندىگى ايدان انىق. عىلىم مەن شارۋالاردىڭ تاجىريبەسىن ۇشتاستىرا بىلگەن كەزدە ءونىمنىڭ مول بولاتىنىنا سەمينارعا قاتىسۋشىلاردىڭ ءبارىنىڭ كوزى جەتتى.

Abai.kz