وقو-نىڭ تۋريستىك مۇمكىندىكتەرىن اۋستريالىقتار جوعارى باعالادى. بۇل تۋرالى «Abai.kz» پورتالى وڭتۇستىك قازاقستان وبلىسى اكىمى ءباسپاسوز قىزمەتىنىڭ «فەيسبۋك» جەلىسىندەگى رەسمي پاراقشاسىنا سىلتەمە جاساي وتىرىپ حابارلايدى.

وڭتۇستىك قازاقستان وبلىسى دەلەگاتسياسىنىڭ اۋسترياعا ءىس-ساپارى اياسىندا وڭتۇستىك ءوڭىردىڭ تۋريستىك مۇمكىندىكتەرى تانىستىرىلدى، سونىڭ ىشىندە «ەكسپو-2017» حالىقارالىق مامانداندىرىلعان كورمەسىنىڭ قوناقتارىنا ارنايى ازىرلەنگەن ءۇش جانە بەس كۇندىك تۋريستىك مارشرۋتتار ۇسىنىلدى.

تانىستىرۋ ءراسىمى اۋستريانىڭ بىرنەشە قالالارىندا وتكىزىلدى، اتاپ ايتقاندا ۆەنا، گراتس (شتيريا فەدەرالدى جەرى) قالالارىندا، كلاگەنفۋرت جانە فيللاح (كارينتيا فەدەرالدى جەرى) قالالارىندا.
ءىس-شاراعا 60-تان استام تۋريستىك وپەراتورلاردىڭ وكىلدەرى قاتىستى، ولاردىڭ اراسىندا جىل سايىن 5 ميلليوننان استام تۋريستەرگە قىزمەت كورسەتەتىن «Broker travel»، «IQ travel»، «OKG»، «HYDROAL PINE»، «Premium health solutions»، «Orion-Reisen» وكىلدەرى بولدى.

سونىمەن قاتار تانىستىرىلىمعا الدىڭعى قاتارلى كونسالتينگتىك كومپانيالار وكىلدەرى قاتىستى.
جالپى العاندا، وڭتۇستىك قازاقستان وبلىسىنىڭ كورىكتى جەرلەرى، قازاقستاننىڭ تاريحى مەن مادەنيەتى اۋستريالىق تۋروپەراتورلاردىڭ ۇلكەن قىزىعۋشىلىعىن تۋىنداتتى. ءىس-شارانىڭ قورىتىندىسى بويىنشا «Ontustik tourism center» تۋريستىك-اقپاراتتىق ورتالىعى مەن ءىرى تۋريستىك ۇيىمدار اراسىندا اقپارات جانە تۋريستەر الماسۋ جونىندە كەلىسىمدەرگە قول جەتكىزىلدى.

Abai.kz