ماسكەۋدە كىسى ءولتىردى دەگەن كۇدىكپەن ۇستالعان وزبەكستاندىقتى قاماۋدا ۇستاۋ مەرزىمىن ۇزارتتى
ماسكەۋلىك سوت كىسى ءولتىردى دەگەن كۇدىكپەن ۇستالعان وزبەكستان ازاماتى گۇلچەحرا بوبوكۋلوۆانى قاماۋدا ۇستاۋ مەرزىمىن 29 قازانعا دەيىن سوزدى.
سوت تەرگەۋشى ءوتىنىشىن قاناعاتتاندىرىپ، بوبوكۋلوۆانى قاماۋدا ۇستاۋ مەرزىمىن تاعى دا سوزدى، دەپ حابارلادى سوتتىڭ ءباسپاسوز حاتشىسى اناستاسيا پىليناعا سىلتەمە جاساعان رەسەيلىك باق.
بوبوكۋلوۆانى بۇعان دەيىن "بۋتىركا" تەرگەۋ اباقتىسىنىڭ پسيحياتريالىق بولىمشەسىنە اۋىستىرعان. 24 ناۋرىزدا كۇدىكتىنى سەربسكي اتىنداعى ينستيتۋتقا پسيحياتريالىق ساراپتامادان وتكىزۋ ءۇشىن اپاردى. بوبوكۋلوۆاعا اباقتىدا قاتاڭ باقىلاۋ ورناتىلعان.
گۇلچەحرا بوبوكۋلوۆا 29 اقپاندا ماسكەۋدىڭ "وكتيابرسكوە پولە" مەترو ستانتسياسىنىڭ ماڭىندا ۇستالدى. ول بالانىڭ كەسىلگەن باسىن ۇستاپ تۇردى. كۋاگەرلەردىڭ ايتۋلارىنشا، ايەل ءوزىن جارىپ جىبەرەتىنىن ايتىپ، "اللاحۋ اكبار" دەپ ايقايلاعان. كەيىن كۇدىكتىنىڭ ءتورت جاستاعى قىزدىڭ كۇتۋشىسى ەكەنى انىقتالدى. تەرگەۋ مالىمەتى بويىنشا، ول اتا-انالارىنىڭ جۇمىسقا كەتۋىن كۇتىپ، بالانى ءولتىرىپ قانا قويماي، پاتەردى ورتەپ جىبەرگەن. وعان كىسى ءولتىرۋ قىلمىسى بويىنشا ايىپ تاعىلدى.
بوبوكۋلوۆا كىناسىن مويىندادى جانە رەسەي پرەزيدەنتى ۆلاديمير ءپۋتيننىڭ سيريانى بومبالاۋىنان كەك الۋ ءۇشىن وسىنداي ارەكەتكە بارعانىن مالىمدەدى.
اباي-اقپارات
