قىرعىزستاننىڭ وزبەكستان ەلشىلىگىندەگى قىزمەتكەرلەر بەكەتتە ۇستالعان ءابدۋميتالىپ ورمانوۆتى، ۋرمات بەرداليەۆتى، جەنيش تاشماتوۆ پەن نۇربەك ۋسۋپباەۆتى بوساتىپ، ەلگە قايتارۋ ءۇشىن جۇمىس ىستەپ جاتىر. قازىر ديپلوماتيالىق قىزمەت دەڭگەيىندە كەلىسسوزدەر جۇرۋدە.

ەسكە سالايىق، 22 تامىزدا شەكارانىڭ داۋلى ۋچاسكەسىندەگى ۋنگار-توو رەترانسلياتورى ورنالاسقان ماڭعا وزبەكستان ءىىم-ءنىڭ شامامەن جەتى قىزمەتكەرى مي-8 تىكۇشاعىمەن قوندى. ودان سوڭ قىرعىزستان بۇل اۋدانعا ميليتسيانىڭ قوسىمشا كۇشتەرى مەن شەكاراشىلارىن جىبەردى.

24 تامىزدا تاڭەرتەڭ شەكارا قىزمەتىنىڭ حابارلاۋىنشا، ۋنگار-توو تاۋىنداعى راديورەلەلىك بەكەتتىڭ ءتورت قىزمەتكەرىن وزبەكستانداعى يانگيكۋرگان ميليتسياسىنا الىپ كەتكەن.

ۋنگار-توودا قىرعىزدىڭ "كەربەن" راديورەلەلىك بەكەتى ورنالاسقان. بىرنەشە جىل بۇرىن وزبەكستان شەكاراشىلارى سول جەرگە بلوكپوست ورناتۋعا تالپىنعان ەدى. كەلىسسوزدەردەن سوڭ ولار داۋلى اۋماقتان كەتكەن ەدى.