ءبىزدىڭ قازاق «بىرەۋ تويىپ سەكىرەدى، بىرەۋ توڭىپ سەكىرەدى» دەگەندى  قالاي تاۋىپ ايتقان.   جەكسەنبى كۇنى ەلوردا  حالقى  سوعان كۋا بولدى.  شەنەۋنىكتەر مارافون ۇيىمداستىرىپ،  قالانىڭ جارتىسىن  قولدان «پاراليزوۆات» ەتىپ تاستادى. 

استانانىڭ سول جاعىنان وڭ جاعىنا، وڭ جاعىنان سول جاعىنا جەتە الماي زارىققان جۇرتتا ەسەپ جوق. بىرەۋ پوەزدان قالدىم دەپ ەڭىرەيدى. بىرەۋ اۋەجايعا جەتە الماي زار يەلەدى.  تىرشىلىكتىڭ كۇندەلىكتى كۇيبەڭىمەن جۇرگەن جۇرت  نە اندا جوق، نە مۇندا جوق «كەپتەلىستىڭ» تۇتقىنى بولدى دا قالدى. كولىكتەردىڭ ىشىندە  شولدەپ جىلاعان بالالار... 

سەبەبى، كوشە-كوشەنىڭ بارى كولىككە لىق تولعان. قيىلىستاردىڭ بارىندە جول پوليتسياسى قىزمەتكەرلەرى. نە  بىلاي، نە بىلاي جىبەرمەيدى.  قايتا كەرى قۋىپ، جايشىلىقتا  وزدەرى اڭدىپ  ءجۇرىپ ايىپ سالاتىن جول بەلگىسىن دە كەرەك قىلماي، جۇرۋگە  تىيىم سالىنعان جەرلەرگە بۇرىپ جىبەرەدى.  

رۋلدە 4 ساعاتتاي وتىرىپ، جەتەر جەرىمە ارەڭ جەتكەنشە حالىقتىڭ ابدەن بەرەكەسى كەتكەنىن كوردىم. مارافوندى ۇيىمداستىرۋشىلاردىڭ  جاپ-جاقسى ءىستى سونشالىقتى ساۋاتسىز، سونشالىقتى قارابايىر، سونشالىقتى ءبىر جاقتى ۇيىمداستىرعانىنا نالىعان جۇرتتىڭ   رەنجىپ جاندارى كۇيىپ ايتقان سوزدەرىنەن قۇلاق تۇنادى.  

راسىندا مۇنداي   مارافون كىمگە  كەرەك؟  جوعارىداعى شەنەۋنىكتەر ءۇشىن جۇگىرۋگە ىڭعايلى جەر استانانىڭ قاق ورتاسىنداعى كوشەلەر دەپ شەشىم قابىلداعان كىم؟ قالا تۇرعىندارى مۇنداي كەزدە قانداي جاعدايدا قالادى دەگەنگە ولاردىڭ باسى جەتپەگەنى مە؟ 

اۋ، مارافون ۇيىمداستىرعىسى كەلسە، قالا شەتىندەگى  جولدار جەتەدى عوي، سولاردىڭ ءبىر جاعىمەن قۇمارلارى قانعانشا 40-50 شاقىرىمعا جۇگىرسىن.  

كەشكىسىن شەنەۋنىكتەر  تەلەديداردان  دۇرىلدەگەن مارافون وتكەنىن ايتىپ ءماز بولىپ تۇر. سالاماتتى ءومىر سالتى ناسيحاتتالدى دەيدى.    

قايداعى سالاماتتىلىق؟ كەپتەلىسىتە  قالعان قانشا ادامنىڭ قان قىسىم كوتەرىلىپ، باسى اۋىرعانىن، قانشا ءسابيدىڭ شولدەپ شىرىلداعانىن، بيلەتى قالتاسىندا، ءوزى نە ۇشاققا، نە پوەزعا جەتە الماي  جۇيكەسى توزعان جۇرتتىڭ دەنساۋلىعىنا قانشالىقتى زيان كەلتىرگەنىن بىلە مە بۇلار؟ 

ءبىر سوزبەن ايتقاندا، استانادا   ساۋاتسىز ۇيىمداستىرلاعان، تەك «مارافون ءوتتى» دەگەن  بەلگى ءۇشىن قولدان جاسالعان مادەنيەتسىز شارا بولدى. بۇعان بۇكىل حالىق كۋا! 

ينتەرنەت  جەلىسىندە پرەمەر-مينيستر كارىم ءماسىموۆ مارافوننىڭ ۇيىمداستىرىلۋ جاعىن سىنادى دەگەن اقپارات ءجۇر. وتە ورىندى سىن.  ويتكەنى، مۇنداي مارافوننىڭ قالالىقتار ءۇشىن كوك تيىنعا دا كەرەگى  جوق.

عابدۋل مەرقۇرمان

(Cۋرەتتەر تengrinews.kz سايتىنان الىندى)

Abai.kz