بۇل تۋرالى قازاقستان قاجىلىق ميسسياسىنىڭ توراعاسى، نايب ءمۇفتي سەرىكباي قاجى وراز الماتىدا وتكەن قمدب تورالقا ماجىلىسىندە مالىمدەدى.

ءمۇفتياتتىڭ قاجىلىقپەن اينالىسۋعا ۇمىتكەر تۋريستىك فيرمالار اراسىندا تۇڭعىش رەت اشىق كونكۋرس جاريالاعانىن اتاپ وتكەن سەرىكباي قاجى وراز بۇل باستامانىڭ وڭ ناتيجە بەرە باستاعانىن جەتكىزدى. ونىڭ ايتۋىنشا، بۇرىن قاجىلىقپەن اينالىسىپ كەلگەن 20 كومپانيانىڭ جارتىسى عانا، ياعني 10-ى كونكۋرستىڭ العاشقى تالابىن ورىنداي العان. ساۋد ارابيا كورولدىگى (ساك) قاجىلىق مينيسترلىگى مەن ءدىني باسقارمانىڭ تالابىن ورىنداي الماعان 10 كومپانيا ءىرى فيرمالارمەن بىرىككەن.

نايب ءمۇفتي س.ساتىبالدىۇلى رەسەيدە 20 مىڭ قاجىعا نەبارى 9 تۋريستىك فيرما قىزمەت ەتەتىنىن العا تارتتى. «ال ءبىزدىڭ ەلدە 4-5 مىڭ ادامعا 20 كومپانيا قىزمەت كورسەتىپ كەلدى. ءتىپتى، وسىعان دەيىن 50-70 ادامدى قاجىلىققا اپارعان، بىلاي ايتقاندا، قىزمەت ساپاسى قمدب تالابىنا ساي كەلمەگەن فيرمالار دا بولدى. اشىق كونكۋرستى جاريالاۋداعى نەگىزگى ماقسات – قاجىلىق ساپارىنىڭ ساپاسى مەن قىزمەتىن جاقسارتۋ، جەرلەستەرىمىزدىڭ قاۋىپسىزدىگىن جان-جاقتى قامتاماسىز ەتۋ، وسى سالادا كەمىندە 5 جىل قىزمەت ەتكەن تاجىريبەسى مول كومپانيالاردى ىرىكتەۋ، ىرىلەندىرۋ، قاجىلىق ماۋسىمىنداعى ۇيىمداستىرۋ جۇمىستارىن وڭتايلاندىرۋ، ت.ب. » دەپ اتاپ ءوتتى تورالقا ماجىلىسىندە قازاقستان قاجىلىق ميسسياسىنىڭ توراعاسى سەرىكباي قاجى وراز.

ءدىني باسقارمانىڭ ەلىمىزدە قاجىلىق مادەنيەتىن قالىپتاستىرۋ باعىتىندا اتقارىپ جاتقان جۇمىستارى جايلى بايانداپ بەرگەن ول وسى جىلى قازاقستان قاجىلارى ءۇش قالادان، اتاپ ايتقاندا، استانا، الماتى جانە شىمكەنت شاھارىنان تاسىمالداناتىنىن مالىمدەدى.

«قاجىلارىمىز وسى نەگىزگى ءىرى قالالارىمىزدان ۇشادى. ساك قاجىلىق مينيسترلىگىنىڭ قاجىلىق ساپارىن ۇيىمداستىرۋعا ەنگىزگەن جاڭا ەرەجەسىنە سايكەس، وتكەن جىلدان باستاپ اشىلعان تىكەلەي رەيس وتانداستارىمىزدى ءمادينا، جيددا قالالارىنا 5 ساعات 30 مينۋتتا جەتكىزدى»، – دەدى نايب ءمۇفتي.

 قمدب ءباسپاسوز قىزمەتى

Abai.kz