قر اقپارات جانە كوممۋنيكاتسيالار ءمينيسترى داۋرەن اباەۆ مينيسترلىكتىڭ كەڭ اۋقىمدى ينتەرنەت جەلىسىمەن قوسىمشا 2 ميلليونعا جۋىق اۋىل تۇرعىنىن ينتەرنەتپەن قامتاماسىز ەتۋدى جوسپارلاپ وتىرعانىن مالىمدەدى، - دەپ حابارلايدى Tengrinews.kzء تىلشىسى.

بۇل تۋرالى مينيستر بۇگىن استانا ەكونوميكالىق فورۋمى اياسىندا مينيسترلىك پەن دۇنيەجۇزىلىك بانكتىڭ بىرلەسىپ ۇيىمداستىرعان Building a Digital Future دوڭگەلەك ۇستەل ماجىلىسىندە باياندادى. 

"مەن قازاقستاننىڭ ساندىق قوعام قۇرۋ جولىنداعى جەتىستىكتەرى تۋرالى ايتىپ بەردىم. سونىمەن قاتار قر اقپارات جانە كوممۋنيكاتسيالار مينيسترلىگىنىڭ 2020 جىلعا دەيىنگى جوسپارىن ورتاعا سالدىم", - دەپ جازدى اباەۆ Facebook جەلىسىندەگى رەسمي پاراقشاسىندا. ونىڭ ايتۋىنشا، مىنا جوسپارلار قولعا الىنعان: 

- كەڭ اۋقىمدى ينتەرنەت جەلىسىمەن قوسىمشا 2 ميلليونعا جۋىق اۋىل تۇرعىنىن قامتاماسىز ەتۋ;
- ساندىق ساۋاتتىلىق دەڭگەيىن 85 پايىزعا دەيىن، ال ەلەكتروندىق قىزمەتتەردى پايدالاناتىن ازاماتتار ۇلەسىن 70 پايىزعا دەيىن ۇلعايتۋ;
- ساندىق ەفيرلىك حابار تاراتۋ جەلىسىمەن حالىقتىڭ 95 پايىزىن قامتۋ; 
- اقپاراتتاندىرۋ سالاسىنداعى مەملەكەتتىڭ كۇردەلى شىعىستارىن ازايتىپ، جوبالاردى جەكە ينۆەستيتسيالار ەسەبىنەن جۇزەگە اسىرۋعا ءوتۋ;
- ەلەكتروندىق ۇكىمەت سەرۆيستەرىنىڭ كەمىندە 80 پايىزىن "بۇلتتى" ينفراقۇرىلىمعا كوشىرۋ.

"ساندىق الەم وتە جىلدام وزگەرىپ جاتىر. بۇل وزگەرىستەردەن شەت قالۋ - جاھاندىق ەكونوميكا كوشىنەن ۇزاق جىلدارعا قالىپ قويۋمەن بىردەي", - دەدى مينيستر.

Aباي-اقپارات