بۇگىن الماتى نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ 15 جىلدىق مەرەيتويىنا وراي «يسلامي ءبىلىم بەرۋ ورىندارى جانە ولاردىڭ جاڭساق تۇسىنىكتەردى تۇزەتۋدەگى ءرولى»  اتتى حالىقارالىق عىلىمي-تاجىريبەلىك كونفەرەنتسيا ءوتتى، - دەپ حابارلايدى قمدب ءباسپاسوز قىزمەتى.

ءدىني ءبىلىم بەرۋ سالاسىن جەتىلدىرۋگە ارنالعان كونفەرەنتسيا جۇمىسىنا قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى، قمدب توراعا ورىنباسارى سەرىكباي قاجى وراز، ناۋرىزباي قاجى تاعانۇلى، ەار ۋاقىفتار ءمينيسترى پروفەسسور  مۇحامماد مۇحتار جۇما، الماتى قالالىق ىشكى ساياسات ءبولىمىنىڭ باسشىسى ساياسات نۇربەك، سونداي-اق ەلىمىزدىڭ جانە شەتەلدىك مارتەبەلى عالىمدار مەن قوناقتار قاتىستى.

ء«بىز ساناۋلى جىلداردا ەلىمىزدىڭ ءدىني سالاسىنداعى جۇمىستارعا جاڭا وزگەرىستەر ەنگىزىپ، جاڭا باستامالاردى جۇزەگە اسىرىپ كەلەمىز. سول جۇمىستاردىڭ ءبىر باعىتى – ءدىني ءبىلىم بەرۋ سالاسى. بۇگىنگى تاڭدا ءدىني باسقارما مەشىتتەرىندە 545 جوعارى ءبىلىمدى، 797 ورتا ارناۋلى ءبىلىمدى ماماندار قىزمەت ەتۋدە. ءدىني باسقارما 2020 جىلعا دەيىنگى ءدىني ءبىلىم سالاسىن دامىتۋعا ارنالعان تۇجىرىمداما قابىلدادى. تۇجىرىمدامانىڭ ماقساتى – مەشىت-مەدرەسەلەرىمىزدى ءبىلىمدى دە بىلىكتى كادرلارمەن تيىسىنشە قامتاماسىز ەتۋ، ءدىن ماماندارىنىڭ الەۋەتىن جاڭا دەڭگەيگە كوتەرۋ، ءدىني ءبىلىم سالاسىن جاقسارتۋ»، – دەدى  باس ءمۇفتي ەرجان قاجى مالعاجىۇلى.

كونفەرەنتسيادا ءدىني ءبىلىم بەرۋدى جەتىلدىرۋ، يمامداردىڭ بىلىكتىلىگىن ارتتىرۋ، جاستاردى جات اعىمداردىڭ ىقپالىنان ساقتاندىرۋ ماسەلەلەرىنە قاتىستى حالىقارالىق دەڭگەيدەگى عالىمدار تىڭ پىكىرلەرىمەن ءبولىسىپ، تاجىريبەلەرىن ورتاعا سالدى.

اباي-اقپارات