بۇگىن مەملەكەت باسشىسى قازاقستاننىڭ ۇلتتىق قاۋىپسىزدىك كوميتەتىنىڭ توراعاسى ۆلاديمير جۇماقانوۆتى قابىلدادى. اقتوبەدەگى تەراكتى تۋرالى بايانداما جاساعان ۇقك باسشىسى بۇگىن ءداستۇرلى ەمەس ءدىني اعامنىڭ وكىلدەرى تاعى دا اتىس ۇيىمداستىرعانىن ايتتى.

«بۇگىن تاڭعى 08:06-دا ءداستۇرلى ەمەس ءدىني اعامنىڭ 6 وكىلى 2 گرۋپپاعا ءبولىنىپ لاڭكەستىك شابۋىل جاساۋدا. ولاردىڭ ءبىر توبى بۇگىن اقتوبەدەگى پيونەر لاگەرىنە شابۋىل جاسادى»،-دەدى ۇقك باسشىسى ۆلاديمير جۇماقانوۆ.

ۇقك باسشىسىنىڭ مەملەكەت باسشىسىمەن كەزدەسۋىنەن كەيىن قازاقستاننىڭ ىشكى ىستەر مينيسترلىگىنىڭ ءباسپاسوز حاتشىسى الماس سادۋباەۆ بۇل مالىمەتتەردىڭ جالعان ەكەندىگىن مالىمدەدى.

«اقتوبەدەگى لاگەرگە ەشقانداي شابۋىل جاسالعان جوق. اتالعان شابۋىل تۋرالى اقپارات ءبىزدىڭ ءىىم-گە كەلىپ ءتۇستى جانە ءجىتى تەكسەرىلدى. تەراكتى بويىنشا ۇستالعانداردىڭ سانى بۇرىڭعىداي – 4 ادام عانا. ىشكى ىستەر ورگاندارىنىڭ جەكە قۇرامى كۇشەيتىلگەن رەجيمدە جۇمىس جۇرگىزۋدە. اقتوبەدەگى جاعداي تۇراقتاندىرىلدى جانە ءبىزدىڭ باقىلاۋىمىزعا الىندى»،-دەيدى الماس سادۋباەۆ.

ءتۇيىن: قازىرگىدەي الاعاي دا، بۇلاعاي كەزەڭدە قازاقستاننىڭ قۇزىرلى ورگاندارى ءبىر-ءبىرىن تەرىستەيتىن ءار ءتۇرلى مالىمەتتەر تاراتۋدا. ءوز كەزەگىندە قازاقستاننىڭ ۇقك مەن ءىىم-گىنىڭ اقتوبەدەگى لاڭكەستىك شابۋىلدارعا قاتىستى پىكىرى ەكىگە جارىلدى. وسىنىڭ الدىندا قر ءىىم اقتوبەدەگى تەراكتىنى "قازاقستاندى ازات ەتۋ ارمياسى" دەيتىن لاڭكەستىك ۇيىمنىڭ ءوز موينىنا العاندىعىن حابارلاعان بولاتىن. ال قر ۇقك ءدال وسى اتاۋمەن ەشبىر ۇيىم تىركەلمەگەنىن جانە مۇنداي ۇيىمنىڭ مۇلدە جوق ەكەنىن حابارلادى.

قۇزىرلى ورگاندار اراسىندا ءسىز بەن ءبىز تۇسىنبەيتىن جاعدايلاردىڭ ورىن الىپ جاتقانى جاسىرىن ەمەس. ونىڭ كورىنىسى ۇقك مەن ءىىم ءبىر-ءبىرىنىڭ اقپاراتتارىن تەرىستەپ جاتىر. حالىق ءبىر وقيعاعا قاتىستى ەكى ءتۇرلى دەرەك ۇسىنعان ەكى ورگاننىڭ قايسىسىنىڭ اقپاراتىنا سەنۋى كەرەك؟!

نۇرزات توعجان

Abai.kz