قر مادەنيەت جانە سپورت ءمينيسترى ارىستانبەك ءمۇحاماديۇلى دوپينگ داۋىنا ىلىنگەن سپورتشىلارعا قاتىستى مالىمدەمە جاسادى.

مينيستر مىرزانىڭ ايتۋىنشا، سپورتشىلاردىڭ ءار قايسىسى حالىقارالىق وليمپيادالىق كوميتەتتىڭ شەشىمىنە شاعىمدانۋعا قۇقىلارى بار. سونداي-اق، ءمۇحاماديۇلى: حوك ءبىزدىڭ اۋىر اتلەتتەردى سپورتتان مۇلدە الاستاتپاعان، تەك بەلگىلى ءبىر مەرزىمگە شەتتەتۋ تۋرالى شەشىمگە كەلگەن", - دەدى.

"قازىرگى تاڭدا، ءبىزدىڭ سپورتشىلارىمىز ساراپتاما قورىتىندىلارىمەن مۇقيات تانىسىپ جاتىر. ءبىز دە ءوز كەزەگىمىزدە قولىمىزدان كەلگەن كومەكتى كورسەتەتىن بولامىز. مورالدىق، قۇقىقتىق جاعىنان (...) بارلىق اسپەكتىلەرى قارالادى. ءبىز ءوز سپورتشىلارىمىزدى قورعايمىز. ەشكىم ولاردىڭ قۇقىقتارىن شەكتەي المايدى. قازىر ولار از ۋاقىتقا سوپرتتان شەتتەتىلگەنىمەن، ەڭ سوڭعى شەشىمدى حوك ايتاتىن بولادى. حالىقارالىق وليمپيادا كوميتەتىنىڭ شەشىمىنەن كەيىن عانا اۋىراتلەتيكا فەدەراتسياسى ءوز شەشىمىن بىلدىرەدى. وعان دەيىن ەشكىم ءبىزدىڭ سپورتشىلارعا باعا بەرۋگە قاقىسى جوق",-دەدى مينيستر ارىستانبەك ءمۇحاماديۇلى.

ايتا كەتەيىك، دوپينگ داۋىنا ىلىككەن قازاقستاندىق سپورتشىلارعا قاتىستى حالىقارالىق وليمپيادا كوميتەتى  ماۋسىمنىڭ 27-كۇنى شەشىم شىعاراتىنىن مالىمدەگەن. لوندون وليمپياداسىندا ەل قانجىعاسىن التىنعا تولتىرعان قازاقستاندىق اۋىر اتلەتتەردىڭ قانىنا جۇرگىزگەن ساراپتامادا كۇدىكتى فەرمەنتتەر تابىلىپ، يليا يلين، مايا مانەزا، زۋلفيا چينشانلو جانە سۆەتلانا پودوۆەدوۆالار سپورتتان ۋاقىتشا شەتتەتىلگەن بولاتىن.

اتالعان وقيعاعا قاتىستى تاعى ءبىر اۋىر اتلەت ۆلاديمير سەدوۆ ءوزىنىڭ "ينستاگرام" جەلىسىندەگى پاراقشاسىندا سپورتشىلاردىڭ دوپينگ داۋىنا ىلىنۋىنە باس باپكەر الەكسەي ني كىنالى دەپ جازعان بولاتىن.

Abai.kz