ەلىمىز ەگەمەندىك الىپ، ەتەك-جەڭىمىزدى جيناپ، ەڭسەمىزدى تىكتەگەنىمىزگە شيرەك عاسىردان اسسا دا، ءوز كەزەگىندە وزگە مەملەكەتكە بودان بولعانىمىزدىڭ نەگىزگى كۋاسى رەتىندە "قازاقستان" اتاۋىمەن "تاۋەلسىز" انىقتاماسى قاتار قولدانىلىپ كەلەدى. ايداي الەمدى اۋزىنا قاراتقان الپاۋىتتاردىڭ دا، كۇنى كەشە عانا بوداندىقتان ارىلعان وزگە مەملەكەتتەردىڭ اتاۋىنا دا مۇنداي انىقتاما ء سوز تاڭىلعان ەمەس. نەگە رەسەي فەدەراتسياسى "تاۋەلسىز رەسەي" نەمەسە رەسەي مەن قاتار ەۋروپا ەلدەرىنىڭ ەزگىسىندە بولعان قىتاي "تاۋەلسىز قىتاي", اقش-تىڭ ىقپالىندا بولعان جاپونيا "تاۋەلسىز جاپونيا" دەپ اتالمايدى؟ ەكىنشى دۇنيەجۇزىلىك سوعىستان كەيىن ازاتتىق العان افريكا ەلدەرىنىڭ اتاۋىندا نەگە "تاۋەلسىز" ءسوزى جوق؟ ونى ايتاسىز، كسرو-نىڭ بوداندىعىنان بوساعان كەشەگى "باۋىرلاس" ەلدىڭ قايسىسى ءوزىن "تاۋەلسىز ارمەنيا", "تاۋەلسىز ءازىربايجان", "تاۋەلسىز وزبەكستان" ،ت.ب. اتاپ ءجۇر؟ جالپى تمد كولەمىندە بىزدەن باسقا "تاۋەلسىز" اتانىپ جۇرگەن ەل بار ما ءوزى؟ رەسەيگە ەشقاشان تاۋەلدى بولماعان سياقتى، باياعىدان ازات، باياعىدان بوستان ەل سياقتى ولار. تەك ءبىز عانا... "تاۋەلسىزدىك" سوزىنە تاس كەنەدەي جابىسىپ العانبىز. 

ءيا، ازاتتىق تالاي شەيىت بولعان باستىڭ، توگىلگەن جاستىڭ ەسەبىنەن كەلگەن ارداقتى ۇعىم. بىراق، ول ءسوز "باسىن يزەسە دە، تىزەسىن بۇكپەگەن" ۇلتتىڭ ءوز شاڭىراعىندا وتاۋى ورتاسىنا تۇسكەنىن، ەكى ءجۇز جەتپىس جىل بويى "كورشى" ەلدىڭ ۋىتىن بويىنا دارىتىپ كەلگەنىن ايعاقتايتىن دۇنيە بولماۋى ءتيىس.

ال ءسىز قالاي ويلايسىز، وقىرمان؟

Cالتانات ءشىنادىل

Abai.kz