كەزدەسۋ بارىسىندا ەكىجاقتى ءبىرشاما وزەكتى، حالىقارالىق دەڭگەيدەگى كەيبىر تۇيتكىلدى ماسەلەلەر تالقىلاندى. قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ بايان-ولگي ايماعىنداعى تابيعي اپاتتان زارداپ شەككەن وتباسىلارعا 200 مىڭ دوللار كولەمىندە اقشالاي قارجى بولىنەتىنىن مالىمدەدى.

كەشە عانا بايان ولگي قالاسىندا بولىپ، استىنا ات ءمىنىپ قايتقان كارىم ءماسىموۆتىڭ بار جومارتتىعى 200 مىڭ دوللاردان اسپاي قالعانى قالاي؟

بۇكىل ەل بولىپ، "قازاقستان موڭعولياداعى قانداستارعا قول ۇشىن سوزاتىن بولدى" دەپ تاقيامىزدى اسپانعا اتقانداعى كومەگىمىزدىڭ ءتۇرى وسى-اق پا؟

200 مىڭ دوللار دەگەنىڭىز ەكى-ءۇش ءۇي سالۋعا عانا جەتەتىن قارجى. جارايدى، بەس-التى ءۇي سالىنسىن دەلىك. قالعان قازاق قايتپەك؟ دالادا قالماق پا؟

كەشە بۇكىل باق پەن الەۋمەتتىك جەلى ۇكىمەت باسشىسىنا ودا ايتىپ ەدى. سول ودانىڭ وتەۋىنە بولا قوماقتى كومەك بولار دەپ ويلاعانبىز. سويتسەك، ءماسىموۆ مىرزا تاعى دا الداپ كەتتى. وزىنە كەرەمەت جارناما جاساپ، ءاپ-ساتتە وزگەرىپ شىعا كەلدى. 

"قازاق ۇكىمەتى موڭعولياداعى قازاقتارعا 200 مىڭ دوللار بەردى" دەپ ايتۋدىڭ ءوزى ۇيات. بۇل ءبىزدىڭ ەلدەگى ورتا دەڭگەيلى بيزنەسمەننىڭ قولىنان كەلەتىن شارۋا عوي. بۇلاي كۇلكى بولعانشا، ءماسىموۆ ۇكىمەتى باعزى قالپىمەن ۇندەمەي قالعانى جاقسى ەدى. 

ءشارىپحان قايسار

Abai.kz